საქართველოს ეკონომიკისა და მდგრადი განვითარების მინისტრი ისრაელში, ისრელის ტრანსპორტის მინისტრს ისრაელ კაცს შეხვდა. შეხვედრაზე მინისტრებმა ორი ქვეყნის თანამშრომლობის შესახებ იმსჯელეს.
ასევე განხილული იქნა ისრაელსა და საქართველოს შორის ავიარესების რაოდენობის ზრდის საკითხიც 6-დან 10 რეისამდე ორივე მიმართულებით და ავიაბაზარზე ახალი ავიაკომპანიების შემოსვლის შესახებ.
საქართველოს ეკონომიკისა და მდგრადი განვითარების მინისტრმა განაცხადა, რომ ორივე მიმართულებით ტურისტების რაოდენობა იზრდება, რისთვისაც არსებული რეისები საკმარისი არ არის. მინისტრის თქმით, საჭიროა 90-იან წლებში ისრაელ-საქართველოს შორის გაფორმებული ხელშეკრულება გადაიხედოს.
ისრაელის ტრანსპორტის მინისტრის განმარტებით, ის მოხარულია თუ ბაზარზე კონკურენცია გაიზრდება და საქართველოსა და ისრაელს შორის ავიამიმოსვლის სიხშირე გაიზრდება. მინისტრის თქმით, კონკურენციის ზრდა ბაზარზე ტარიფების დაწევას განაპირობებს.
"ვიმედოვნებ, რომ ისრაელი დასვენებისათვის საქართველოსათვის თურქეთის ალტერნატივა გახდება", _ განაცხადა ისრაელ კაცმა.
შეგახსენებთ, რომ საქართველოსა და ისრაელს შორის ტურიზმისა და ეკონომიკის სხვა სფეროებში თანამშრომლობის გაღრმავებისა და ქართველი ტურისტებისათვის სავიზო რეჟიმის გაუქმების საკითხი განიხილეს ეკონომიკისა და მდგრადი განვითარების მინისტრის ვერა ქობალიასა და ისრაელის ტურიზმის მინისტრ სტას მისეჟნიკოვის შეხვედრაზე, რომელიც რადენიმე დღის წინ თბილისში გაიმართა.
როგორც შეხვედრის დასრულების შემდეგ ვერა ქობალიამ განაცხადა, საქართველოში ისრაელიდან ტურისტების რაოდენობა 20 პროცენტით გაიზარდა. მისი თქმით, ამ პროცესს კიდევ უფრო გააქტიურებს ისრაელსა და საქართველოს შორის სავიზო მიმოსვლის გაუქმება და ეს საკითხი უკვე მომავალი წლისათვის იქნება მოგვარებული. მინისტრმა ასევე აღნიშნა, რომ ორი ქვეყნის ეკონომიკურ ურთიერთობებზე საუბარი გაგრძელდება მისი ოფიციალური ვიზიტის დროს ისრაელის სახელმწიფოში, რომელიც მომავალ კვირაში შედგება.
ისრაელის ტურიზმის მინისტრმა სტას მისეჟნიკოვმა განსაკუთრებული მნიშვნელობა მიანიჭა ორ ქვეყანას შორის სავიზო რეჟიმის გაუქმების საკითხს, რომელიც განსაკუთრებულად გაზრდის ტურისტულ ნაკადებს საქართველოდან ისრაელში და პირიქით. მინისტმა ასევე აღნიშნა, რომ ორი ქვეყნის ეკონომიკური თანამშრომლობის დიდი პოტენციალიდან გამომდინარე, შესაძლებელია გაიზარდოს ისრაელელ ინვესტორთა მონაწილეობა საქარველოს ეკონომიკურ პროექტებში.