იტალიის ხელისუფლების გადაწყვეტილებით, იტალიაში მიგრანტებს, მათ შორის ქართველებს, დროებით ლეგალურად ცხოვრებისა და მუშაობის უფლებას მისცემენ. ინფორმაციას ადგილობრივი მედია ავრცელებს.
გავრცელებული ინფორმაციით, კორონავირუსის პანდემიის ფონზე, მიგრანტებს, რომელთაც ქვეყანაში ლეგალური ცხოვრებისა და მუშაობისთვის აუცილებელი დოკუმენტები არ აქვთ, ქვეყანაში ლეგალურად ყოფნისა და შრომის შესაძლებლობა მიეცემათ.
ამავე გადაწყვეტილების ფარგლებში, მიგრანტები იტალიის ჯანმრთელობის სერვისებით სარგებლობასაც შეძლებენ.
"ჩვენ დანაშაულის წინააღმდეგ ბრძოლაში მნიშვნელოვან შედეგს მივაღწიეთ და დავასრულეთ დასაქმების შავი ბაზარი", - განაცხადა პრემიერ მინისტრმა ჯუზეპე კონტემ პრესკონფერენციაზე.
ახალი გადაწყვეტილების მიხედვით, ყველა იმ პირმა, რომელიც იტალიაში 2020 წლის 8 მარტამდე შევიდა, უნდა შეავსოს სპეციალური განაცხადი და მოითხოვოს ქვეყანაში 6 თვით ცხოვრების უფლება. ამ უფლების მოპოვება ავტომატურად გულისხმობს მუშაობისა და ჯანდაცვის სერვისებით სარგებლობის უფლების მიღებას.
