დიდი ბრიტანეთისა და ჩრდილოეთ ირლანდიის გაერთიანებული სამეფოს დედოფალი ელისაბედ II ერისადმი საგანგებო მიმართვას გააკეთებს. განცხადებას ბუკინგემის სასახლე ავრცელებს.
დედოფლის 68-წლიანი მმართველობის განმავლობაში ეს იქნება მეოთხე საგანგებო მიმართვა კრიზისის დროს.
ბუკინგემის სასახლეში განაცხადეს, რომ დედოფლის გზავნილი, რომელიც ჩაწერილია მის სამეფო რეზიდენციაში, უინძორის ციხე-სიმაგრეში, ტელევიზიით, რადიოთი და სოციალური ქსელით კვირას, 5 აპრილს გავრცელდება.
დედოფალი ერისადმი მიმართვას ტრადიციულად საშობაოდ ავრცელებს, სხვა შემთხვევაში ეს ძალიან იშვიათად ხდება.
როგორც ვარაუდობენ, მონარქის გზავნილი უკავშირდება დიდ ბრიტანეთში კორონავირუსით ინფიცირებისა და გარდაცვალების მასშტაბის ზრდას.
მანამდე დედოფალმა საგანგებო მიმართვა მხოლოდ ოთხჯერ გაავრცელა. პირველად ეს იყო სპარსეთის ყურის ომის დროს, 1991 წელს, მეორედ - უელსის პრინცესის, დიანას დაკრძალვისას, 1997 წელს და მესამედ, დედა დედოფლის, ელისაბედის გარდაცვალების დროს, 2002 წელს.
დედოფალმა კიდევ ერთი სატელევიზიო მიმართვა 2012 წელს, მისი მმართველობის საიუბილეო წელს გააკეთა.
ბრიტანეთის ჯანმრთელობის ეროვნული სამსახურის ინფორმაციით, ამ დროისთვის, ქვეყანაში, კორონავირუსით ინფიცირების 38 168 შემთხვევაა აღრიცხული. გარდაიცვალა 3 605 პაციენტი.