ხანგრძლივი მოლაპარაკებების შედეგად "ვისოლმა" სიდიდით მსოფლიოს მეოთხე ნავთობკომპანია "ტოტალთან" ექსკლუზიური გრძელვადიანი ხელშეკრულება გააფორმა და "ტოტალის" საავტომობილო ზეთებისა და საპოხი მასალების ექსკლუზიური იმპორტიორი გახდა საქართველოში.

როგორც "ვისოლის" მენეჯმენტი აცხადებს, კომპანია ყოველმხრივ შეეცდება რაც შეიძლება მეტი ტოტალის პროდუქცია გაყიდოს.

"ამიერიდან კომპანიის მომხმარებლებს ექსკლუზიურად "ვისოლის" ქსელში შეეძლებათ არა მხოლოდ უმაღლესი ხარისხის იტალიური საწვავი პროდუქტების, არამედ ევროპული სტანდარტების საავტომობილო ზეთებისა და საპოხი მასალების შეძენა. "ვისოლი" "ტოტალთან" ექსკლუზიური პარტნიორობით კიდევ უფრო გაიმყარებს საქართველოს ნავთობბაზრის ლიდერის პოზიციებს. ტოტალის საქართველოში შემოსვლა ასევე მნიშვნელოვანი ნაბიჯია ჩვენი ქვეყნის ეკონომიკის შემდგომი განვითარების გზაზე," - განაცხადა ვისოლის სამეთვალყურეო საბჭოს თავმჯდომარემ სოსო ფხაკაძემ.

მისი განმარტებით, "ტოტალთან" მოლაპარაკებები მიმდინარეობს ასევე ავიასაწვავის შემოტანაზეც.
"ავიაციის საწვავის შემოტანაზე მიმდინარეობს მოლაპარაკებები. თუ სინერგია დავინახეთ ამ მიმართულებით, მაშინ შესაბამის ხელშეკრულებასაც გავაფორმებთ და ქართულ ბაზარზე "ტოტალის" ავიასაწვავსაც შემოვიტანთ," - განაცხადა ფხაკაძემ.

"ვისოლში" განმარტავენ, რომ მომხმარებელს "ტოტალის" ზეთებისა და საპოხი მასლების შეძენა "ვისოლის" ავტოგასამართ სადგურებზე მთლელი ქვეყნის მასშტაბით შეეძლებათ.

"ტოტალის" შემოსვლასთან ერთად "ვისოლში" ავტოტექმომსახურეობის ახალი პროდუქტების დანერგვასა და მომსახურეობის ახალი სტანდარტების დამკვიდრებაც ინერგება.

"ორი წელია ვაკვირდებით საქართველოში მიმდინარე პროცესებს და ვსწავლობთ ქვეყნის სიანვესტიციო კლიმატს. შესაბამისად, აშკარაა, რომ "ვისოლი" არის ის ბრენდი, რომლის სახელთანაც "ტოტალის" ასოცირება ქვეყნის ბაზარზე დამკვიდრების წარმატებული გზაა," - აცხადებს "ტოტალის" მმართველი დირექტორი ჟან მიშელ ჰიერონიმუსი.

აღსანიშნავია, რომ "ტოტალი" ბიზნესს მსოფლიოს 130 ქვეყანაში აწარმოებს. დასაქმებულია 96 400 ადამიანი და მისი წლიური გაყიდვები საშუალოდ 158,7 მილიარდ ევროს შეადგენს.

"ტოტალი" წარომდგენილია ასევე სომხეთსა და აზერბაიჯანში.