გარემოს დაცვისა და ბუნებრივი რესურსების სამინისტროში დონორთა საკოორდინაციო შეხვედრა გაიმართა. შეხვედრას მინისტრ გოგა ხაჩიძესთან ერთად დიპლომატიური კორპუსის, საერთაშორისო და არასამთავრობო ორგანიზაციების წარმომადგენლები დაესწრნენ.
"გარემოს დაცვის სამინისტროსთვის ძალიან მნიშვნელოვანია დონორთა კოორდინირებული მუშაობა. დღევანდელი შეხვედრა ხელს შეუწყობს თანამშრომლობის გაღრმავებას და ურთიერთობის დახვეწას. ასეთი შეხვედრები აუცილებელია, რომ არ მოხდეს პროექტების დუბლირება და ღონისძიებები ისახავდეს ერთ საერთო მიზანს. მოხარული ვარ, რომ საკითხმა გარემოს დაცვის სამინისტროში ძალიან სისტემური ხასიათი მიიღო. დონორებიც კმაყოფილები არიან და რაც მთავარია, შედეგებიც უფრო თვალნათელი და ხელშესახებია", - განაცხადა გოგა ხაჩიძემ.
მისივე თქმით, სექტორულ საკოორდინაციო შეხვედრაზე ბუნებრივი კატასტროფების რისკის შემცირების საკითხები და ამ სფეროში მიმდინარე პროექტები განიხილეს. აღნიშნული მიმართულებები ქვეყნისთვის პრიორიტეტულია.
ამასთან, გარემოს დაცვის სამინისტრო, გაეროში წარსადგენად, ეროვნულ ანგარიშს - "საერთაშორისო სტრატეგია კატასტროფების რისკების შესამცირებლად", ამზადებს.
"სამინისტრო მნიშვნელოვანი ინიციატივით გამოდის. ასეთი შეხვედრები საშუალებას გვაძლებს ერთად განვიხილოთ მიმდინარე პროექტები და ვიცოდეთ, ვინ რას აკეთებს ბუნებრივი კატასტროფების რისკის შესამცირებლად. ეს დაგვეხმარება უკეთესად დავგეგმოთ რა მიმართულებით უზრუნველყოთ კატასტროფების რისკის შემცირებაში საქართველოს მხარდაჭერა. ამჟამად ჩვენ ვეხმარებით სამინისტროს გარემოს დაცვის ეროვნული გეგმის შემუშავებაში, სადაც ერთი თავი სწორედ კატასტროფათა რისკის შემცირებას ეხება", - განაცხადა ჰოლანდიის ელჩის მოადგილემ ჰეინო ვან ჰოუველინგენმა.