დღეს, 6 ოქტომბერს, ქუთაისში უნიქარდის წარმომადგენლობამ ფუნქციობა დაიწყო. ქალაქის 15-ზე მეტ კომპანიაში უკვე შესაძლებელია უნიქარდის ბარათის აღება და 80 ობიექტში კი ქუთაისელებს და ქალაქის სტუმრებს უნიქარდით სარგებლობა და ქულების დაგროვება შეეძლებათ.
უნიქარდის რეგიონული გაფართოება კომპანიის 2010 წლის სტრატეგიის ნაწილია, რომელიც საქართველოს უმსხვილეს ქალაქებში წარმომადგენლობებისა და სერვის-ცენტრების გახსნას და უნიქარდის ქსელში სავაჭრო და სხვა ტიპის ობიექტების ჩართვას ითვალისწინებს.
უნიქარდი პირველი ქართული უნივერსალური დაგროვებითი ბარათია. მისი გამოყენების არეალი მხოლოდ დედაქალაქით არ შემოიფარგლება.
"ქუთაისში ჩვენი შესვლა ეკონომიკური აქტივობის ზრდით არის გამოწვეული. თავისუფალი ეკონომიკური ზონის შექმნისა და ქალაქის ცენტრის რეკონსტრუქციის დაწყების შემდეგ, ქუთაისში გარკვეული გამოცოცხლება იგრძნობა. ფუნქციონირებს დასავლური სტანდარტების რამდენიმე სავაჭრო ცენტრი. უნიქარდის შესვლა ქალაქში კონკურენციას გაამძაფრებს და ქუთაისელებს ნებისმიერი შენაძენთან ერთად უნიქარდის ბარათზე დაგროვებაც შეეძლებათ", - აცხადებს კომპანიის გენერალური დირექტორი ბესო აბულაძე.
ქუთაისის გარდა, უნიქარდის სერვის-ცენტრი ბათუმშიც ფუნქციობს, რომელიც ამა წლის ივლისში გაიხსნა. კომპანიის გაფართოების შემდეგი ეტაპი რუსთავის, თელავის, ზუგდიდისა და გორის წარმომადგენლობების გახსნას მოიცავს.
დღეისათვის უნიქარდით სარგებლობა, სამი უმსხვილესი ქალაქის გარდა ქსელური კომპანიების მეშვეობით საქართველოს მთელს ტერიტორიაზეა შესაძლებელი.
"ქსელი მოიცავს 900-მდე ობიექტს, რომლითაც სარგებლობა უნიქარდის ბარათის 300 ათასზე მეტ მფლობელს შეუძლია. საჩუქრების მიღება-გამოწერა 15 ქულიდან არის შესაძლებელი", - აცხადებს ბესო აბულაძე.
ქუთაისის ახალი სერვის-ცენტრი სავაჭრო ცენტრ „ქარვასლაში" ოქტომბრის მეორე ნახევარში გაიხსნება.
უნივერსალური დაგროვებითი ბარათი „უნიქარდი" ქართულ ბაზარზე 2010 წლის 7 აპრილს შემოვიდა. დღემდე გაცემულია 300 ათასზე მეტი ბარათი და „უნიქარდით" სარგებლობა 900-მდე ობიექტში არის შესაძლებელი. უნიქარდი" წარმოადგენს „უნივერსალ ქარდ ქორფორეიშენის" ბრენდს. ამ კომპანიის დამფუძნებლები ინგლისური საინვესტიციო ფონდი GML Capital -ის შვილობილი კომპანია Kazbeg Holding და საქართველოს მოქალაქეები არიან.
GML Capital არის მსხვილი ინგლისური ბანკის Standard Bank-ის მიერ შექმნილი საინვესტიციო ფონდი, რომელიც ახორციელებს სხვადასხვა ბიზნეს პროექტების დაფინანსებას აღმოსავლეთ ევროპის და კავკასიის რეგიონებში.