"როგორც რუსი ოკუპანტები და სოხუმისა და ცხინვალის საოკუპაციო რეჟიმები აცხადებენ, საქართველოს ოკუპირებულ ტერიტორიებზე ქართველთა ყოფნის კვალის წასაშლელად, ისტორიულ ქართულ ტოპონიმებს, ოდესღაც თითქოსდა არსებული არაქართული ე.წ. ძირძველი სახელწოდებებით ცვლიან. კერძოდ, ცხინვალის რეგიონში განზრახულია ადმინისტრაციული რუკიდან 200 ქართული დასახელების გაქრობა და მათ ნაცვლად ოსური და რუსული ტოპონიმების დამკვიდრება.

ქართული ტოპონიმებისათვის სახელების შეცვლა რუსეთის მიერ საქართველოს ოკუპირებულ ტერიტორიებზე მრავალჯერ განხორციელებული ეთნიკური წმენდის ლოგიკურ გაგრძელებას წარმოადგენს. ამგვარი ქმედებებით რუსეთს განზრახული აქვს ასობით ათას იძულებით გადაადგილებულ პირს მოუსპოს საკუთარ სახლებში დაბრუნების საფუძველი, წაშალოს ეთნიკური წმენდის სამხილები და შექმნას ე.წ. ახალი რეალობის არსებობის ილუზია", - ნათქვამია განცხადებაში.

მათივე შეფასებით, რუსეთის ფედერაციის მიერ საქართველოს წინააღმდეგ განხორციელებული პოლიტიკა ცხადყოფს, რომ არ არსებობს ისეთი სიმდაბლე, რასაც კრემლი და მის მიერვე შექმნილი საოკუპაციო რეჟიმები არ ჩაიდენენ.

შეგახსნებთ, რომ ცხინვალის რაიონის სოფელ ზონკარს ამიერიდან ცადიხაუ ეწოდება, ერედვს - ირიხაუ, _ ეს გადაწყვეტილება მიიღო ოს სეპარატისტების მიერ შექმნილმა ე. წ. კომისიამ, რომელსაც სეპარატისტები ტოპონიმიკის კომისიას უწოდებენ და რომელიც, მათი ინფორმაციით, "ისტორიულად ოსური მიწებისა და ადგილებისთვის ოსური სახელწოდებების დაბრუნებითაა დაკავებული".

"კომისიის წევრებმა სამხრეთ ოსეთის დასახლებული პუნქტების ისტორიულად ოსური სახელწოდებები განიხილეს, რათა სწორედ ამ სახით დაიტანონ ისინი ახალ ადმინისტრაციულ რუკაზე. მაგალითისთვის - ცხინვალის რაიონის სოფელი ზონკარს დაუბრუნდა სახელწოდება ცადიხაუ, ხოლო ერედვს ირიხაუ", _ იუწყებიან სეპარატისტები.