თეირანში, ამირ ქაბირის უნივერსიტეტის წინ გამართულ საპროტესტო აქციაზე, რამდენიმე საათით დააკავეს ირანში დიდი ბრიტანეთს ელჩი რობერტ მაკაირი. ინფორმაციას BBC-ი ავრცელებს.
დიდი ბრიტანეთის საგარეო საქმეთა მინისტრი დომინიკ რააბი მალევე გამოეხმაურა ელჩის დაკავებას და მას "საერთაშორისო სამართლის უხეში დარღვევა უწოდა".
"თეირანში ჩვენი ელჩის, ყოველგვარი ახსნა-განმარტებისა და საფუძვლის გარეშე, დაკავება საერთაშორისო სამართლის უხეში დარღვევაა.
ირანის ხელისუფლება მნიშვნელოვანი გადაწყვეტილების გზასაყარზე დგას. მას შეუძლია დაადგეს პოლიტიკური და ეკონომიკური იზოლაციის გზას, ან გადადგას ნაბიჯები დაძაბულობის შემცირებისა და ვითარების დეესკალაციის დიპლომატიური გზით მოგვარებისკენ", - ნათქვამია დომინიკ რააბის მიერ გავრცელებულ განცხადებაში.
მოგვიანებით განცხადება თავად ბრიტანეთის ელჩმა რობერტ მაკაირმაც გააკეთა. მან დაადასტურა დაკავება და ამავე დროს აღნიშნა, რომ საპროტესტო აქციაში მონაწილეობას არ იღებდა.
შაბათს, ასობით სტუდენტი შეიკრიბა თეირანში ამირ ქაბირის უნივერსიტეტის შენობის წინ, რათა პატივი მიეგოთ უკრაინული თვითმფრინავის კატასტროფისას დაღუპულებისთვის. შეკრება მალევე საპროტესტო აქციაში გადაიზარდა.
მომიტინგეები გმობდნენ ხელისუფლების უგუნურებას და მოითხოვდნენ მაღალი თანამდებობის პირების გადადგომას. ასევე თვითმფრინავის ჩამგდებისთვის პასუხისმგებელთა დასჯას.
გუშინ, 11 იანვარს, გამთენიისას, ირანის შეიარაღებული ძალების გენერალურმა შტაბმა აღიარა თვითმფრინავის ჩამოგდება და ამას ადამიანური შეცდომა უწოდა.
ირანის ხელისუფლება ავიაკატასტროფის პირველივე დღიდან თვითმფრინავის ჩამოგდებას ძრავის აალებას უკავშირებდა და მომხდართან ყოველგვარ კავშირს კატეგორიულად უარყოფდა.
სამგზავრო თვითმფრინავი Boeing 737, რომელიც თეირანიდან კიევს 8იანვარს მიემგზავრებოდა, თეირანში, იმამ ხომეინის საერთაშორისო აეროპორტიდან აფრენიდან 2 წუთში ჩამოვარდა.
თვითმფრინავში 167 მგზავრი და ეკიპაჟის 9 წევრი იმყოფებოდა. ყველა მათგანი დაიღუპა. მათ შორის იყვნენ უკრაინის, ირანის, ავღანეთის, კანადის, დიდი ბრიტანეთის, გერმანიისა და შვედეთის მოქალაქეები.
