აშშ რუსეთის ფედერაციას საფრთხედ არ აღიქვამს. ამის შესახებ აშშ-ს თავდაცვის მდივანმა, რობერტ გეითსმა "ინტერფაქსისთვის" მიცემულ ინტერვიუში განაცხადა.
ჟურნალისტის კითხვას, რომ წლების განმავლობაში რუსეთი და აშშ დაპირისპირებული მხარები იყვნენ, ამის გათვალისწინებით ამერიკის ნაციონალური უსაფრთხოებისთვის რუსეთი წამოადგენს თუ არა საფრთხეს, გეითსმა უპასუხა, რომ "მე რუსეთს, როგორც საფრთხეს არ განვიხილავ".
"ვფიქრობ, რომ რუსეთსა და აშშ-ს შორის ნორმალური ურთიერთობა ვითარდება. ჩვენ ვართ პარტნიორები გარკვეულ სფეროებში და ზოგიერთში კი კონკურენტები. ჩვენ მნიშვნელოვან საკითხებში ვთანამშრომლობთ, მაგალითად ანტიტერორისტულ საკითხებში, ირანის ბირთვულ საკითხებთან დაკავშირებით, როგორც ეს გაეროს უშიშროების საბჭოზე მიღებულმა რეზოლუციამ აჩვენა. ჩვენ ერთობლივად ვებრძვით მეკობრეობას", - განაცხადა გეითსმა.
მისივე შეფასებით, აშშ-ს ბირთვული რაკეტების პროგრამების მოდერნიზაცია არის დიდი მონაპოვარი სტრატეგიული თავდასხმითი შეიარაღების ხელშეკრულების ფარგლებში.
"ეს ორივე მხარისთვის წინასწარ დადგენილი, გამჭირვალე და პროგნოზირებად თამაშის წესებს აწესებს. ეს პროგრამა აბსოლიტურად ნორმალურია", - აღნიშნა მან.
