ლუგარის ლაბორატორიის წინააღმდეგ საუბრები რუსული ნარატივის ნაწილია, - ამის შესახებ ჯანდაცვის მინისტრმა დავით სერგეენკომ განაცხადა.
მისი თქმით, BBC-მ შესანიშნავი გამოძიება ჩაატარა ერთი თვის წინ, რომელმაც ძალიან დეტალურად დაადასტურა, რომ სრულიად უსაფრთხოა და არაფერი არ ხდება.
"ლუგარის ლაბორატორია საზოგადოებრივი ჯანდაცვის ალბათ ერთ-ერთი ყველაზე დიდი ინფრასტრუქტურაა, რაც კი არსებობს რეგიონში. თავის დროზე აქ ძალიან დიდი ინვესტიცია გაკეთდა, როგორც ინფრასტრუქტურულად, ისე ტექნოლოგიურად, ასევე ადამიანური რესურსების მხრივ. შედარებაც კი გამიჭირდება, აი, რომ წარმოიდგინოთ ძალიან დიდი, 2000 საწოლიანი საუნივერსიტეტო კლინიკა, ასეთი კალიბრის დაწესებულება არის ეს ლაბორატორია, რომელზეც ზოგ მეზობელ ქვეყანას აქვს პოზიტიური დამოკიდებულება და თანამშრომლობა, ზოგს კი ეს მოსვენებას არ აძლევს. ლუგარის ლაბორატორიის ამოქმედების დღიდან ჩვენ გვქონდა რამდენიმე წერილი მედიაში, რომელსაც დიდად არ ვაქცევდით ყურადღებას, ბოლო თვეებში გაძლიერდა ეს კამპანია ლუგარის ლაბორატორიისადმი. BBC-მ შესანიშნავი გამოძიება ჩაატარა ერთი თვის წინ, რომელმაც ძალიან დეტალურად დაადასტურა, რომ სრულიად უსაფრთხოა და არაფერი არ ხდება. მე პირადად გამიჭირდება, რომ გითხრათ, რა არის დაზუსტებული მიზეზი იმ ნარატივისა, რომელიც მოდის რუსეთის მხრიდან, მაგრამ ის, ვინც იგივე სინქრონში და იგივე ნოტებს იღებს საინფორმაციო ველში, ვისი ინტერესი არის გასაგებია ცალსახად. რუსეთის ინტერესები ძალიან რთულია ჩემთვის რომ აღვიქვა, მაგრამ აქ, საქართველოში ვინც იგივე სიმღერებს მღერის, ჩემთვის ორი აზრი არ არის ვის ინტერესებსაც ემსახურება", - განაცხადა სერგეენკომ.
