პროფესიული განათლება - ეს იქნება ერთ-ერთი ყველაზე მნიშვნელოვანი მიმართულება ჩვენს რეფორმაში - ამის შესახებ საქართველოს პრემიერ - მინისტრმა მამუკა ბახტაძემ იყალთოს სამონასტრო კომპლექსში განათლების რეფორმის ხედვის წარდგენისას განაცხადა.
როგორც მთავრობის მეთაურმა აღნიშნა, ის ორიენტირებული იქნება რეგიონული განვითარების საჭიროებებზე და სწრაფ დასაქმებაზე.
„ჩვენი ამოცანა იქნება, უმოკლეს პერიოდში გავზარდოთ სტუდენტების რაოდენობა რეგიონებში და განვავითაროთ პროფესიული განათლების ცენტრები. უმაღლესი განათლების მიმართულებით გვექნება დაფინანსების ახალი მოდელი; მოხდება ინტეგრაცია ევროპულ უმაღლესი განათლების სივრცეში. როდესაც ჩვენ ვსაუბრობთ საქართველოს, როგორც რეგიონული განვითარების ცენტრის შესახებ, ერთ-ერთი მთავარი მიმართულებაა საქართველოს ისტორიული როლი - იყოს რეგიონის ცენტრი და ამავდროულად, განათლების ცენტრი ჩვენი ფართო რეგიონისთვის“, - განაცხადა მამუკა ბახტაძემ.
პრემიერ-მინისტრის თქმით, ამავე დროს, შეიქმნება საგანმანათლებლო ელექტრონული რესურსების პორტალი, სისტემა იმუშავებს ბლოკჩეინ ტექნოლოგიების გამოყენებით, რაც უზრუნველყოფს სანდოობის ამაღლებას, გამჭვირვალობის უმაღლეს ხარისხს, ფინანსების დაზოგვას, პროცესების გამარტივებას, ორიენტირებულობას სწრაფ შედეგებზე.
