ხორავას ქუჩაზე მომხდარი მკვლელობის საქმეზე დღეს, თბილისის საქალაქო სასამართლოში მხარეები დასკვნით სიტყვას იტყვიან.
როგორც ჟურნალისტებთან ერთ-ერთი ბრალდებულის ადვოკატმა, ტარიელ კაკაბაძემ განაცხადა, სასმართლო მტკიცებულებების გაანალიზების შედეგად, სწორ დასკვნამდე მივა.
"დაცვის მხარე ვაპირებთ დასკვნით სიტყვაში დეტალურად მიმოვიხილოთ საქმეში არსებული მტკიცებულებები, გავაანალიზოთ მტკიცებულებები და მე დარწმუნებული ვარ, სასამართლო, მტკიცებულებათა გაანალიზების შემდეგ, აუცილებლად მივა იმ დასკვნამდე, რომ ბრალდების მხარის პოზიცია საერთოდ აცდენილია ჭეშმარიტებას, ხოლო დაცვის მხარის პოზიცია არის დამაჯერებელი, უტყუარი, რომელიც სასამართლომ უნდა გაიზიაროს", - აცხადებს კაკაბაძე.
მისი განმარტებით, ბრალდებული არასრულწლოვნის ჩვენების შედეგად, დადასტურდა, რომ მკვლელობის საქმესა და დანაშაულის დაფარვაში სხვა პირებიც მონაწილეობდნენ, რომელთა პასუხისმგებლობის საკითხიც ამ დრომდე არ დამდგარა.
"გუშინ ბრალდებულის დაკითხვით კიდევ ერთხელ დადასტურდა ის, რასაც დაცვის მხარე მთელი სასამართლო განხილვებისას ვაპელირებდით. ჩვენ საბოლოოდ ვითხოვთ ერთ რამეს, რომ კონკრეტული პირები პასუხისგებაში მიეცნენ და დაისაჯონ იმ ქმედების ადეკვატურად, რაც მათ ჩაიდინეს და ასევე პასუხისგებაში მიეცნენ ის პირები, ვინც ჩაიდინა დანაშაული და საერთოდ არ აქვს ბრალი წაყენებული. საგამოძიებო ორგანოს აქვს ყველა მასალა და მტკიცებულება, რომ ეს საქმე როგორმე გადავიდეს სწორ რელსებზე და ადეკვატური შეფასება მიეცეს თითოეული პირის ქმედებებს", - აცხადებს კაკაბაძე.