ხვალ სავარაუდოდ, დასკვნით სიტყვას ვიტყვით მხარეები. ვაპირებ დასკვნით სიტყვაში განვმარტო და დავასაბუთო, თუ ვის და რის მიერაა დაზიანებები მიყენებული. ჩემი დაცვის ქვეშ მყოფი ასევე აპირებს საბოლოო სიტყვით სარგებლობას და სასამართლოსთვის მიმართვას, - აცხადებს ხორავას ქუჩაზე მომხდარი მკვლელობის საქმეზე ერთ-ერთი ბრალდებულის ადვოკატი, ინგა შარაშენიძე.
მისი განმარტებით, ექსპერტების ჩვენებით, ბევრი ისეთი გარემოება გამოიკვეთა, რითიც გამოძიება უნდა დაინტერესდეს.
"მე ველოდები რა თქმა უნდა სასამართლოს დადებით გადაწყვეტილებას. მე ვთვლი, რომ დადასტურდა ის, თუ რა გააკეთა ჩემი დაცვის ქვეშ მყოფმა. დეტალებზე ამ ეტაპზე არ შემიძლია ვისაუბრო, თუმცა ძალიან ბევრი რამ გამოიკვეთა მაია ნიკოლეიშვილისა და ომარ ჯოხაძის დასკვნით. ძალიან ბევრი ისეთი გარემოებაა, რის გამოც გამოძიება უნდა გაგრძელდეს და ძალიან ბევრი სხვა ადამიანი უნდა დაისაჯოს. არამარტო ის პირები, ვისზეც აქამდე მიმდინარეობდა აპელირება, არამედ სხვა პირებიც, რომელთაც აქვთ დანაშაული ჩადენილი", - აცხადებს შარაშენიძე.
ხორავას ქუჩაზე მომხდარი სისხლიანი გარჩევის საქმეზე სასამართლო განაჩენს სავარაუდოდ, 30 მაისს გამოიტანს.
