ნატო-ს გენერალური მდივნის განცხადება მისასალმებელია იმასთან დაკავშირებით, რომ პროგრესი, რომელიც ჩვენ გვაქვს, ამ ინსტრუმენტების გამოყენებაში და რეფორმების გატარებაში უახლოეს სამიტზე აისახოს. ზუსტად რა ფორმით მოხდება ეს, ამაზე საუბარი ნაადრევია, – ამის შესახებ საქართველოს პარლამენტის პირველმა ვიცე-სპიკერმა თამარ ჩუგოშვილმა განაცხადა.
მისი თქმით, ნატო-ს ბრიუსელის სამიტთან დაკავშირებით მოლოდინია, რომ მოკავშირეების მიერ საქართველოს პროგრესი აისახება, რომელსაც ქვეყანა წლიდან წლამდე განიცდის.
„ყველაფერს ვაკეთებთ იმისთვის, რომ ეს რაც შეიძლება სწრაფად და დროულად მოხდეს. სამიტთან დაკავშირებით მოლოდინია, რომ პროგრესი აისახება, რადგან ქვეყანას წლიდან წლამდე პროგრესი აქვს. რა ფორმით, ამაზე საუბარი ნაადრევია. მუდმივად არსებობს იმის ამბიცია, რომ ნატო-ს წევრები გავხდეთ, მით უმეტეს, საქართველო თავის ვალდებულებებს ძალიან აქტიურად ახორციელებს და ინსტრუმენტებიც გვაქვს. პირველ რიგში, პრემიერის განცხადება ჩვენი სურვილი და განცდაა, რომ რეფორმების იმ ტემპით, რომელსაც ვახორციელებთ, წევრობისთვის მზად საკმაოდ მალე ვიყოთ“, – განაცხადა ჩუგოშვილმა.