ეუთოს საპარლამენტო ასამბლეის პრეზიდენტი, საქართველოს პარლამენტის წევრი, გიგი წერეთელი სამუშაო ვიზიტით ალბანეთის დედაქალაქში იმყოფებოდა. ვიზიტის ფარგლებში, გიგი წერეთელი ქვეყნის პრეზიდენტს, ილირ მეტას, ალბანეთის ასამბლეის სპიკერს გრამოზ რუჩის, საგარეო საქმეთა მინისტრს, დიმიტრი ბუშატს, აგრეთვე მმართველი პარტიისა და ოპოზიციის ლიდერებს და ეუთოს საპარლამენტო ასამბლეაში ალბანეთის დელეგაციის წევრებს შეხვდა.
„ალბანეთი არა მხოლოდ სარგებლობს ეუთოს მხარდაჭერით, არამედ მას აქტიური წვლილი შეაქვს რეგიონის უსაფრთხოების საკითხებში. მიგრაციისა და ტერორიზმის წინააღმდეგ პრობლემების გადაჭრა კოლექტიურ მოქმედებებს მოითხოვს და მოხარული ვარ, რომ ამ საკითხში ალბანეთი, საერთაშორისო საზოგადოებას, აქტიურად მხარში უდგას, რაც ჩვენს თანამშრომლობას კიდევ უფრო დინამიურს და საინტერესოს ხდის. ამავე დროს, ალბანეთის მომავალი ევროპული ინტეგრაციის გზაზე არსებობს მნიშვნელოვანი გამოწვევები, რასაც ხელისუფლების მხრიდან უფრო აქტიური და მიზანმიმართული ძალისხმევა ჭირდება. ეუთო მზად არის კიდევ უფრო მეტი ჩართულობით დაეხმაროს ქვეყანას ამ მიმართულებით. კერძოდ კი, კანონის უზენაესობის და სასამართლო სისტემის, ტერორიზმთან და ორგანიზებულ დანაშაულის წინააღმდეგ ბრძოლის და საარჩევნო რეფორმის კუთხით", - განაცხადა გიგი წერეთელმა ქვეყნის ლიდერებთან შეხვედრებზე.
ტირანაში გამართულ შეხვედრებზე გიგი წერეთელი ეუთოს საპარლამენტო ასამბლეის, როგორც საერთაშორისო დიალოგის პლატფორმის მნიშვნელობასაც შეეხო და ორგანიზაციის კიდევ უფრო გაძლიერების აუცილებლობაზე ისაუბრა. აღნიშნულ საკითხზე საუბრისას, ეუთოს საპარლამენტო ასამბლეის პრეზიდენტმა, სამხრეთ-აღმოსავლეთ ევროპის ქვეყნების აქტიური ჩართულობის მნიშვნელობას გაუსვა ხაზი.
გიგი წერეთელმა ალბანეთის პრეზიდენტს, პარლამენტისა და მთავრობის ლიდერებს მადლობა გადაუხადა საქართველოს ტერიტორიული მთლიანობის და მისი სუვერენიტეტის მხარდაჭერისთვის და აღნიშნა, რომ საერთაშორისო ფორუმებზე საქართველოსთვის სენსიტიური თემების განხილვისას, როგორიცაა საქართველოს ტერიტორიების ოკუპაცია და ადამიანის უფლებების მდგომარეობა, არაღიარების პოლიტიკა, რუსეთის აგრესია და მისი შედეგები, საქართველოს მიმართ გამოხატულ მხარდაჭერას, ქვეყნისთვის განსაკუთრებული მნიშვნელობა აქვს.
ეუთოს საპარლამენტო ასამბლეის პრეზიდენტი ვიზიტის ფარგლებში სამხრეთ-აღმოსავლეთ ევროპის საკითხებთან დაკავშირებულ ფორუმს დაესწრო და ღონისძიების მონაწილეებს მიმართა. გიგი წერეთელი ტერორიზმის წინააღმდეგ ბრძოლის საკითხებზე გამართულ შეხვედრაში სიტყვით გამოვიდა, სადაც აშშ-ის სახელმწიფო დეპარტამენტის მდივნის მოადგილე პიტ მოროკო და დასავლეთ ბალკანეთის საპარლამენტო და სამთავრობო ლიდერები მონაწილეობდნენ.
