„მინიმუმ ორი მკვლელი გარეთ დადის და ფაქტია, რომ მოწმეები არასწორ ჩვენებას აძლევენ, რადგან დანარჩენი დამნაშავეები არ იკვეთებიან“, - განუცხადა „ჯი-ეიჩ-ენს“ ხორავას ქუჩაზე მოზარდებს შორის დაპირისპირებისას მოკული დავით სარალიძის მამამ, ზაზა სარალიძემ.
მისი განმარტებით, დაკავებული ორი ბრალდებულის გარდა, მკვლელობაში სხვა პირებიც მონაწილეობდნენ და მათი სახელები და გვარებიც იცის.
„ვიცი კი არა, ერთში უკვე დარწმუნებული ვარ, მეორესაც მალე მივაკვლევ, თითქმის, ვიცი ისიც ვინაა, დეტალები მაკლია, რომ დავრწმუნდე და ეჭვი ტყუილად არ მქონდეს. სამწუხაროდ, ამის სააშკარაოზე გამოტანის საშუალება არ გამაჩნია, რადგან გამოძიება დამთავრებულია. ახალ მკვლელს აღარავინ გამოაშკარავებს. ახალი მკვლელი, ახალი თანამონაწილე რომ გამოაშკარავდეს, პირდაპირ პროკურატურის და გამოძიების პასუხისმგებლობის საკითხი იკვეთება“, - აცხადებს სარალიძე.
როგორც ის განმარტავს, დღეს დაკითხულმა ერთ-ერთმა მთავარმა მოწმემ, რომელიც ჩხუბის შემსწრე პირია, სასამართლოში ჩვენება შეცვალა.
„გამოძიებაში მიცემული ჩვენება რაღაც დეტალებში შეცვალა, მაგრამ ორივე ბრალდებულს დაადო ხელი. სიმართლე გითხრათ, ეს დეტალი ჩემთვის არაა მნიშვნელოვანი, უფრო დაცვის მხარისთვისაა მნიშვნელოვანი. მოწმემ გამოძიებაში ასეთი ჩვენება მისცა, რომ ერთ-ერთი მკვლელი, რომელიც ჩემს შვილს დანას ურტყამდა, წაქცეულ მდგომარეობაში იყო. ახლა კი ამბობს, რომ დაჩოქილი იყოო. ის ასევე საუბრობს, რომ ფარდულში გაცილებით ბევრი ადამიანი შევიდა, მაგრამ დღეს დააკონკრეტა, რომ ფარდულში მხოლოდ სამი პიროვნება იყო“, - აღნიშნავს სარალძე.
თუ რატომ განსხვავდება დღეს დაკითხული მოწმის ჩვენება გამოძიების ეტაპზე მიცემული ჩვენებისგან, როგორც სარალიძე განმარტავს, არასრულწლოვანის განცხადებით, მან ამით მეგობრები დაიცვა.
„როცა კითხვა დაუსვეს, გამოძიებას თუ რატომ მისცა ასეთი ჩვენება, ასე უპასუხა: ჩემი მეგობრების დაცვა მინდოდაო. კითხვაზე, გამოძიებას მისცა თუ არა ცრუ ჩვენება, პირდაპირ არ პასუხობს გამოძიებაში მოვიტყუეო, აცხადებს, ჩემი მეგობრების დაცვა მინდოდაო. ფაქტია, რომ ან გამოძიებაში თქვა ტყუილი, ან სასამართლოში ამბობს ტყუილს“, - დასძენს სარალიძე.
იმაზე საუბარი, თუ რამდენად სანდოა მისთვის აღნიშნული მოწმის ჩვენება, ჯერ არ შეუძლია, რადგან არასრულწლოვანის დკითხვა დასრულებული არ არის.
„როცა დაცვის მხარე დაუსვამს კითხვებს, რამდენად ჩაიჭრება, ესაა საინტერესო. ყველა მოწმე მალავს იმ ფაქტს, რომ იქ კიდევ არიან მკვლელები, ამ თემაზე არავინ საუბრობს. დღევანდელმა მოწმემ განაცხადა, ლევან დადუნაშვილი დაკავებულმა ერთმა პირმა მოკლა, ჩემი შვილი კი, მეორე დაკავებულმა პირმა. როგორც ასეთი, ლევან დადუნაშვილის მკვლელი და ჩემი შვილის მკვლელი, ორივე რომ ჩემს შვილს დანას ურტყამდა, ეს ჯერ არავის უთქვამს.
მხოლოდ ერთ პიროვენებას ედავებიან ჩემი შვილის მკვლელობას, რომელმაც მას 12 ჭრილობა მიაყენა. ეს გამორიცხულია! მაშინ ზებუნებრივი ძალის პატრონი უნდა ყოფილიყო ის პიროვნება, რომლემაც ჩემს შვილს 12 ჭრილობა მიაყენა. ჭრილობები სულ სხვადასხვა ადგილას: მარცხენა ფერდში, მარჯვენა გვერდზე, წინიდან, უკნიდან აქვს მიყენებული, ანუ გამოდის,რომ ჩემი შვილი შამფურივით ტრიალებდა და ბრალდებული დანას ურტყამდა, ან თვითონ ურტყამდა წრეს და დანას. 2 წლის ბავშვსაც რომ ანახოთ, თუ როგორი დაზიანებები აქვს მას მიყენებული, მიხვდება, რომ არც ერთი და არც ორი პირისგან არაა ის მიყენებული“, - აცხადებს სარალიძე.
შეგახსენებთ, რომ ხორავას ქუჩაზე, 2017 წლის პირველ დეკემბერს ორი მოზარდი დაჭრეს. ერთი მათგანი, ლევან დადუნაშვილი საავადმყოფოში მიყვანამდე გარდაიცვალა, მეორე - დავით სარალიძე კი, მოგვიანებით, საავადმყოფოში. მომხდარი მკვლელობის ფაქტზე სამართალდამცავებმა 2 დეკემბერს, ერთი არასრულწლოვანი დააკავეს და ბრალი განზრახ მკვლელობის მუხლით წაუყენეს. მეორე არასრულწლოვანს კი ბრალი დაუსწრებლად წარუდგინეს. სასამართლომ ორივე ბრალდებულს აღკვეთის ღონისძიების სახით, პატიმრობა შეუფარდა. პროკურატურამ მკვლელობის საქმეზე, დანაშაულის შეუტყობინებლობის ბრალდებით პასუხისგებაში 5 პირი მისცა, რომელთა შორის, ორი მოსწავლის მშობელი და შსს-ს ყოფილი თანამშრომელია. პასუხისგებაში მიცემულთაგან მხოლოდ სამი დააკავეს, რადგან ორ პირზე არასრულწლოვანთა მართლმსაჯულების კოდექსი ვრცელდება.