არასრულწლოვანთა სახიფათო ინტერნეტთამაშთან, „ლურჯ ვეშაპთან“ დაკავშირებით გამოძიება კვლავ მიმდინარეობს. შინაგან საქმეთა სამინისტროში „ჯი-ეიჩ-ენს“ განუცხადეს, რომ მათთან შესული შეტყობინებებისა და განცხადებების საფუძველზე მასშტაბური გამოძიებაა დაწყებული, თუმცა, ამ მომენტისათვის, შეტყობინებებში მოყვანილი ფაქტების რეალობა არ დადასტურებულა.
„საქართველოს შინაგან საქმეთა სამინისტროში არასრულწლოვანთა სახიფათო ინტერნეტთამაშებში ჩართვის ფაქტებზე შემოსული შეტყობინებების და განცხადებების საფუძველზე, სისხლის სამართლის საქმეზე ჩატარებული იქნა ხანგრძლივი და მასშტაბური გამოძიება. გამოკითხული იქნა რამდენიმე ათეული მოზარდი, მათი მშობლები და მათთან კავშირში მყოფი პირები, დათვალიერებული იქნა მათი სოციალური ქსელის პროფილები, მობილური ტელეფონები, კომპიუტერული ტექნიკა და ა.შ.
ჩატარებულმა გამოძიებამ აჩვენა, რომ არცერთ განცხადებაში ან შეტყობინებაში მოყვანილი ფაქტი რეალურად არ დასტურდებოდა. უმეტეს შემთხვევაში მოზარდების პირველადი მონაყოლი ისტორია წარმოადგენდა მათი ფანტაზიის ნაყოფს, რაც განპირობებული იყო სხვადასხვა გარემოებებით, კერძოდ მშობლების ყურადღების მიქცევის, თანატოლებში თავის გამოჩენის და უბრალოდ ხუმრობის მიზნით.
მიუხედავად იმისა, რომ არცერთი კონკრეტული ფაქტი არ დადასტურდა, შინაგან საქმეთა სამინისტროში გამოძიება გრძელდება“, - აცხადებენ შსს-ში.
მიუხედავად შსს-ს განცხადებისა, რომ „ლურჯი ვეშაპის“ თამაში არცერთ შემთხვევაში დადასტურებულა, რამდენიმე დღის წინ, ქობულეთში მცხოვრები ერთ-ერთი არასრულწლოვანის ოჯახის წევრებმა გამოძიებას მიმართეს. მათი განცხადებით, მესამეკლასელ მოზარდს ტელეფონით დაუკავშირდნენ და საშიშ ინტერნეტ თამაშში ჩართვას სთავაზობდნენ.
შსს-ში აცხადებენ, რომ გამოძიება ამ ფაქტთან დაკავშირებითაც დაიწყო.
