„დღეს დაკითხულმა მოწმემ უშუალოდ ნახა ხორავას ქუჩაზე მომხდარი ფაქტობრივი გარემოებები. მან ისაუბრა, თუ რა ვითარებაში მოხდა ბრალდებულების მიერ ბრალად წარდგენილი ქმედების ჩადენა, ასევე, თუ რა ვითარებაში მოხდა სამწუხაროდ გარდაცვლილი ბავშვებისთვის დაზიანებების მიყენება“, - განაცხადა ხორავას ქუჩაზე მოზარდებს შორის მომხდარი მკვლელობის საქმის პროკურორმა, ზვიად ფხაკაძემ.
ის კატეგორიულად გამორიცხავს მოწმის მიერ ჩვენების შეცვლას.
„აღნიშნულმა მოწმემ სასამართლოს ის ინფორმაცია მიაწოდა, რა ინფორმაციაც გამოძიების სტადიაზე აქვს მიცემული. ჩვენების შეცვლა უნდა განვასხვავოთ კონკრეტული დეტალების დაზუსტებისგან. სრული პასუხისმგებლობით მინდა განვაცხადო, რომ მოწმეს ჩვენება არ შეუცვლია. მოწმის მიერ დაცვის მხარისთვის გაცემული პასუხები შესაბამისობაშია გამოძიებაში არსებულ ფაქტობრივ გარემოებებთან“, - განაცხადა ფხაკაძემ.
არის თუ არა დღეს დაკითხული მოწმე ის მოზარდი, რომელმაც პირველ დეკემბერს, ხორავას ქუჩაზე დაზიანებები თავადაც მიიღო, ის ამ კითხვაზე პასუხის გაცემისგან თავს იკავებს.
„მოცემულ ეტაპზე იმის კონკრეტიზაციისგან, დღეს დაკითხული მოწმე არის თუ არა ის პირი, რომელსაც დაზიანება მიაყენეს, თავს შევიკავებ. თუმცა, ვადასტურებ, რომ პირთან დაკავშირებით, რომელმაც დაზიანება მიიღო, გამოძიება მიმდინარეობს“, - განაცხადა ფხაკაძემ.
დაუზუსტებელი ინფორმაციით, მოზარდს, რომელსაც დაზიანებები ჰქონდა, ექსპერტიზა დაგვიანებით ჩაუტადა, რათა დანაშაულის ჩადენის იარაღის დადგენა ვერ მომხდარიყო.
„აღნიშნული ინფორმაცია ჩემთვის არ არის ცნობილი და ინფორმაციის გამავრცელებელი დაგვიანებულ ექსპერტიზაში რას გულისხმობს, არ ვიცი“, - აცხადებს ფხაკაძე.
შემდეგი სხდომა 30 მარტს, 15:00 საათზე ჩაინიშნა.
შეგახსენებთ, რომ ხორავას ქუჩაზე, 2017 წლის პირველ დეკემბერს ორი მოზარდი დაჭრეს. ერთი მათგანი, ლევან დადუნაშვილი საავადმყოფოში მიყვანამდე გარდაიცვალა, მეორე - დავით სარალიძე კი, მოგვიანებით, საავადმყოფოში. მომხდარი მკვლელობის ფაქტზე სამართალდამცავებმა 2 დეკემბერს, ერთი არასრულწლოვანი დააკავეს და ბრალი განზრახ მკვლელობის მუხლით წაუყენეს. მეორე არასრულწლოვანს კი ბრალი დაუსწრებლად წარუდგინეს. სასამართლომ ორივე ბრალდებულს აღკვეთის ღონისძიების სახით, პატიმრობა შეუფარდა. პროკურატურამ მკვლელობის საქმეზე, დანაშაულის შეუტყობინებლობის ბრალდებით პასუხისგებაში 5 პირი მისცა, რომელთა შორის, ორი მოსწავლის მშობელი და შსს-ს ყოფილი თანამშრომელია. პასუხისგებაში მიცემულთაგან მხოლოდ სამი დააკავეს, რადგან ორ პირზე არასრულწლოვანთა მართლმსაჯულების კოდექსი ვრცელდება.