თბილისის უზენაეს სასამართლოში დღეს, ხორავას ქუჩაზე მოზარდებს შორის მომხდარი მკვლელობის საქმეზე ერთ-ერთი მნიშვნელოვანი მოწმე დაკითხეს. არსებული ინფორმაციით, არასრულწლოვანი, რომელმაც დღეს სასამათლოს ჩვენება მისცა, პირველ დეკემბერს, ხორავას ქუჩაზე მომხდარ ინციდენტსა და ჩხუბში მონაწილე პირია.
„დღეს დაკითხული მოწმე ნამდვილად არის ინციდენტსა და ჩხუბში მონაწილე პირი. ის ერთ-ერთი უმნიშვნელოვანესი, პირდაპირი მოწმეა და შეიძლება ითქვას, რომ ის ბრალდების მხარის ოქროს მოწმეა. თუმცა, მოწმის სანდოობასთან დაკავშირებით, ამ ეტაპზე კომენტარს ვერ გავაკეთებ, რადგან დაკითხვა ჯერ არ დაგვისრულებია.
მოწმის თქმით, მან საკუთარი თვალით ნახა, თუ როგორ დაიწყო, როგორ განვითარდა კონფლიქტი და როგორ მოხდა კონკრეტული პირების დაჭრა. შესაბამისად, აღნიშნული მოწმის ჩვენება დაცვის მხარისთვის მნიშვნელოვანია“, - განაცხადა ჟურნალისტებთან ერთ-ერთი ბრალდებულის ადვოკატმა, ტარიელ კაკაბაძემ.
მისი განმარტებით, მოწმემ ისევე როგორც აქამდე დაკითხულმა სხვა მოწმეებმა, გამოძიებაში მიცემული ჩვენება კატეგორიულად შეცვალა.
„დანამდვილებით შეგვიძლია განვაცხადოთ, რომ მან ისევე როგორც, ბრალდების სხვა მოწმეებმა, მნიშვნელოვან საკითხებთან დაკავშირებით კატეგორიულად შეცვალა გამოძიებაში მიცემული ჩვენება. ამას გარდა, მოწმის ჩვენება ეწინააღმდეგება სასამართლოში დაკითხულ სხვა მოწმეთა ჩვენებებს“, - აცხადებს კაკაბაძე.
არსებული ინფორმაციით, დღეს დაკითხული მოწმე ხორავას ქუჩაზე პირველ დეკემბერს თავადაც დაიჭრა, თუმცა, ადვოკატი ამასთან დაკავშირებით დეტალებზე საუბრისგან თავს იკავებს.
„თქვენ გაქვთ ინფორმაცია რომ კონკრეტულ პირს ამ ინციდენტში დაზიანება მიაყენეს. ამასთან დაკავშირებით, თუ ვისგან, რა დაზიანება მიადგა მას, სასამართლოსთვის ჩვენება არ მიუცია“, - აცხადებს ადვოკატი.
შემდეგ სასამართლო პროცესზე აღნიშნულ მოწმეს დაცვის მხარე ჯვარედინი წესით დაკითხავს.
შემდეგი სხდომა 30 მარტს, 15:00 საათზე ჩაინიშნა.
შეგახსენებთ, რომ ხორავას ქუჩაზე, 2017 წლის პირველ დეკემბერს ორი მოზარდი დაჭრეს. ერთი მათგანი, ლევან დადუნაშვილი საავადმყოფოში მიყვანამდე გარდაიცვალა, მეორე - დავით სარალიძე კი, მოგვიანებით, საავადმყოფოში. მომხდარი მკვლელობის ფაქტზე სამართალდამცავებმა 2 დეკემბერს, ერთი არასრულწლოვანი დააკავეს და ბრალი განზრახ მკვლელობის მუხლით წაუყენეს. მეორე არასრულწლოვანს კი ბრალი დაუსწრებლად წარუდგინეს. სასამართლომ ორივე ბრალდებულს აღკვეთის ღონისძიების სახით, პატიმრობა შეუფარდა. პროკურატურამ მკვლელობის საქმეზე, დანაშაულის შეუტყობინებლობის ბრალდებით პასუხისგებაში 5 პირი მისცა, რომელთა შორის, ორი მოსწავლის მშობელი და შსს-ს ყოფილი თანამშრომელია. პასუხისგებაში მიცემულთაგან მხოლოდ სამი დააკავეს, რადგან ორ პირზე არასრულწლოვანთა მართლმსაჯულების კოდექსი ვრცელდება.
