საგარეო ურთიერთობათა კომიტეტის თავმჯდომარე სოფიო ქაცარავა მონტენეგროს პარლამენტის თავმჯდომარეს ივან ბრაიოვიჩს და პარლამენტის წევრებს შეხვდა.
საქართველოში ოფიციალური ვიზიტის ფარგლებში, მონტენეგროს პარლამენტის თავმჯდომარე საერთაშორისო საპარლამენტო კონფერენციაში - „ევროკავშირი და პარტნიორები - მრავალფეროვნება ძლიერი ერთობისთვის" იღებს მონაწილეობას.
შეხვედრაზე, ორმხრივი საპარლამენტო თანამშრომლობის გაძლიერების საკითხები განიხილეს და ამ მიმართულებით მეგობრობის ჯგუფების როლზე გაამახვილეს ყურადღება. მხარეებმა ასევე, ისაუბრეს ისეთი მრავალმხრივი ფორმატების შესახებ, როგორიცაა ეუთო-ს საპარლამენტო ასამბლეა.
შეხვედრაზე განიხილეს მონტენეგროს ნატო-ში გაწევრიანების გამოცდილება და ქვეყანაში გატარებული ის მნიშვნელოვანი რეფორმები, რასაც საქართველო სწორედ ახლა ახორციელებს.
„ჩვენი კოლეგების გამოცდილება ძალიან მნიშვნელოვანია, ვინაიდან მონტენეგრო სულ ახლახან გახდა ალიანსის წევრი, რაც ჩვენი საგარეო პოლიტიკის ერთ-ერთი მთავარი პრიორიტეტია. შეხვედრაზე ასევე, ვისაუბრეთ ევროკავშირში ინტეგრაციის პროცესში ორმხრივ და მრავალმხრივ ფორმატებში თანამშრომლობის შესახებ და საგულისხმო საკითხებთან დაკავშირებით ერთმანეთს გამოცდილება გავუზიარეთ"- განაცხადა შეხვედრის დასრულების შემდეგ სოფიო ქაცარავამ.
