თბილისის საქალაქო სასამართლოში დღეს, 12:00 სათზე ჰიპერმარკეტ „გორგიას“ ხელმძღვანელის, გია გორგოშაძის გატაცების მცდელობის საქმეზე წინასასამართლო სხდომა გაიმართება.
დღევანდელ პროცესზე დაცვისა და ბრალდების მხარეები მტკიცებულებათა დასაშვებობაზე იმსჯელებენ. დღეს სასამართლო ბრალდებულების მიმართ გამოყენებული აღკვეთის ღონისძიების, პატიმრობის გადასინჯვაზეც იმსჯელებს.
შეგახსენებთ, რომ 12 ოქტომბრს, წყნეთის გზატკეცილზე სპეცოპერაცია ჩატარდა, რა დროსაც, სამართალდამცავებმა დანაშაულებრივი ჯგუფი აიყვანეს. მათი ინფორმაციით, ვასილ ვასილიადი, თამაზ მენთეშაშვილი, გურამ დგებუაძე და დავით ფოცხიშვილი სამშენებლო ჰიპერმარკეტების ქსელ "გორგიას" მფლობელის, გია გორგოშაძის გატაცებას გეგმავდნენ. სამართალდამცველებმა იმავე ღამით, პარალელურად ბიზნესმენის ყოფილი მეუღლის, ნინო დარსალიას ბინა გაჩხრიკეს, საიდანაც კომპიუტერი და მობილური ტელეფონები ამოიღეს. გამტაცებლებს გამოსასყიდის სახით ბიზნესმენისგან 5 მილიონი დოლარი უნდა მოეთხოვათ.
