თბილისის სააპელაციო სასამართლომ სპეცოპერაციის დროს დაკავებულ, საედ დუდაევის ადვოკატის, იმედა ქარქაშაძის საჩივარი წარმოებაში არ მიიღო. როგორც „ჯი-ეიჩ-ენს“ ქარქაშაძემ განუცხადა, სასამართლოს ეს გადაწყვეტილება დაცვის მხარისთვის მოულოდნელი იყო.
„სასამართლომ საჩვარი წარმოებაში არ მიიღო, მაგრამ ეს ბრალის დადასტურებას, ან უარყოფას არ ნიშნავს. უბრალოდ, აპელაციამ აღკვეთ ღონისძებაზე აღარ იმსჯელა, საჩვარი დასაშვებად არ ცნო. ეს საბოლოო გადაწყვეტილებაა და არ საჩივრდება. წინასასამართლო სხდომა 16 იანვარსაა ჩანიშნული“, - აცხადებს ქარქაშაძე.
დუდაევის ადვოკატის საჩივარი სააპელაციო სასამართლოში გუშინ შევიდა. მოსამართლე გიორგი მიროტაძეს საჩივრის განსახილველად 72 საათიანი ვადა ჰქონდა.
შეგახსენებთ, რომ ბერი გაბრიელ სალოსის ქუჩაზე სპეცოპერაცია 21 ნოემბერს დაიწყო და თითქმის, 20 საათს გასტანა. სპეცოპერაციას ერთი სპეცრაზმელის და ტერორიზმში ბრალდებული 3 პირის სიცოცხლე ემსხვერპლა.
