პარლამენტის ჯანდაცვის კომიტეტის თავმჯდომარის, აკაკი ზოიძის განცხადებით, საპილოტე რეჟიმში ელექტრონული რეცეპტების ჩართულობა არ სასურველი ხარისხის, ამიტომაც, მიდის საუბარი, რომ ელექტრონული რეცეპტები გახდეს სავალდებულო.
როგორც მან TV პირველის ეთერში განმარტა, ეს სახელმწიფოს საშუალებას მისცემს, მოაწესრიგოს რეცეპტების საკითხი, რადგან საიდუმლო არავისთვისაა, რომ რეცეპტების გარეშე მედიკამენტები კვლავ გაიცემა.
„საიდუმლო არავისთვისაა, რომ კვლავ ხდება რეცეპტების გარეშე მედიკამენტების გაცემა. ელექტრონული რეცეპტების შემთხვევაში რეაგირებაც უფრო ადვილი იქნება იმაზეც, სჭირდება პაციენტს ყველა ის წამალი რაც ექიმმა დაუნიშნა თუ არა, რადგან ზედმეტი წამალი პაციენტის ფინანსური მხარის გარდა ხშირად ჯანმრთელობასაც ვნებს“, - განაცხადა აკაკი ზოიძემ.
ჯანდაცვის კომიტეტის თავმჯდომარემ საყოველთაო ჯანდაცვის პროგრამაში ჩართული კლინიკებისთვის ოპერაციების ფასების დადგენის შესახებაც ისაუბრა.
მისი თქმით, რის საფუძველზე ისაზღვრება ოპერაციის საბაზრო ფასი დაუდგენელია, რადგან ხშირად, თავად კლინიკებსაც არ აქვთ სრულყოფილი ხარჯთაღრიცხვა და გადაცდომა 25, 30 ან მეტი პროცენტია ხოლმე.
„ეს მსოფლიოში დანერგილი პრაქტიკაა. კლინიკის პროფილის მიხედვით განისაზღვრება რესურსტევადობა, პერსონალის დრო, სამედიცინო მასალები, სამეურნეო თუ სხვა ხარჯი, რის საფუძველზეც მიენიჭებათ ქულები. 3 წელიწადში ერთხელ სადაზღვეო ფონდები, ექიმები და ფარმაცევტული კომპანიები დაადგენენ, თითო ქულა რამდენი ლარია. სწორედ ამის მიხედვით განისაზღვრება ფასები“, - განმარტა ზოიძემ და დასძინა, რომ სახელმწიფო უზრუნველყოფს ექიმების ხელფასის ზრდას, რათა მათ, დაბალი ანაზღაურების გამო, ერთდროულად ბევრ სხვადასხვა კლინიკაში არ მოუწიოთ მუშაობა.
