განათლების, მეცნიერებისა და კულტურის კომიტეტის თავმჯდომარე მარიამ ჯაში აფხაზეთის ავტონომიური რესპუბლიკის განათლებისა და კულტურის სამინისტროში გამართულ ღონისძიებას დაესწრო, რომელიც სამინისტროს გასული წლის ანგარიშის პრეზენტაციას დაეთმო.
სამინისტროს საქმიანობის ძირითად მიმართულებებზე და განხორციელებულ აქტივობებზე მოხსენება მინისტრის პირველმა მოადგილემ, მანანა ქვაჩახიამ წარმოადგინა. ღონისძიებაზე დამსწრე საზოგადოებას აფხაზეთის განათლებისა და კულტურის მინისტრი, დიმიტრი ჯაიანი და აფხაზეთის სიმღერისა და ცეკვის სახელმწიფო ანსამბლის სამხატვრო ხელმძღვანელი, ლევან ღვინჯილია მიესალმნენ. სამინისტროს საქმიანობის პრეზენტაციის შემდეგ ღონისძიება კულტურული ნაწილით გაგრძელდა, სადაც აფხაზეთის სახელმწიფო კაპელამ, სოხუმის მოზარდ მაყურებელთა თეატრის დასმა, აფხაზეთის N 2 საჯარო სკოლის მოსწავლეებმა და აფხაზეთის სიმღერისა და ცეკვის სახელმწიფო ანსამბლმა საკუთარი შემოქმედება წარმოადგინეს.
„აფხაზეთის მთავრობის საერთო ანგარიშთან დაკავშირებით, ერთი თვის წინ შეხვედრა გავმართეთ, სადაც განათლების და კულტურის სამინისტროს საქმიანობის გაცნობის მიზნით, ცალკე გაფართოებული შეხვედრის გამართვის სურვილი გამოითქვა. დღეს მოვისმინეთ 2016 წლის საქმიანობის ანგარიში განათლების, კულტურის და სპორტული აქტივობების მიმართულებით და უნდა აღინიშნოს, რომ მიუხედავად ძალიან ბევრი პრობლემებისა, რომლის წინაშეც ჯერ კიდევ რჩება აფხაზეთის მთავრობა და ჩვენი დევნილი მოსახლეობა, ყოველწლიურად მაქსიმალური ძალისხმევა კეთდება ზოგადი და უმაღლესი განათლების ხელმისაწვდომობის კუთხით. დღევანდელ შეხვედრაზე ასევე საშუალება მოგვეცა ახლოს გავცნობოდით იმ შესანიშნავ შემოქმედებით პოტენციალს, რომელიც აფხაზეთის მთავრობის მხარდაჭერით ხორციელდება. ეს არის ნამდვილად უნიკალური შესაძლებლობა, რომ კულტურის სფერო ჩვენ გამოვიყენთ შერიგებისა და სახალხო დიპლომატიის გაძლიერებისთვის", - განაცხადა მარიამ ჯაშმა.
კომიტეტის თავმჯდომარემ სამინისტროს საქმიანობის ანგარიშის პარლამენტში პრეზენტაციის გამართვის სურვილი გამოთქვა და აღნიშნა, რომ დეპუტატების უფრო ფართო წარმომადგენლებისთვის აფხაზეთის განათლების და კულტურის საქმიანობის გაცნობა საინტერესო და მნიშვნელოვანი იქნება, სადაც შესაძლოა დაფინანსების და ბიუჯეტის საკითხების განხილვაც მოეწყოს.
