„ქართული ოცნების“ დეპუტატის, ადამიანის უფლებების დაცვის კომიტეტის თავმჯდომარის სოფიო კილაძის მეუღლე ავთანდილ ხარაძე ლევან იზორიამ დანიშნა გენერალურ ინსპექციაში. ასევე, „ქართული ოცნების“ ახალი სახის, თამარ ხულორდავას მეუღლე ლევან ვახტანგაძე გენერალურ ინსპექციაში დაინიშნა, - ამის შესახებ „ევროპული საქართველოს“ წევრმა, ირმა ნადირაშვილმა დღეს გამართულ ბრიფინგზე განაცხადა.
მისი განცხადებით, საფირმო ნიშნად შეგვიძლია მივიჩნიოთ ნეპოტიზმი. მისივე თქმით, პოლიტიკოსების შვილები, მათი ოჯახის წევრები არ უნდა ხდებოდნენ პოლიტიკური დაპირისპირების სამიზნე და მათ უნდა ჰქონდეთ ნორმალურად ცხოვრების საშუალება, მაგრამ ხანდახან, პოლიტიკოსები თავად საკუთარი საქციელით ქმნიან ვითარებას, როცა საზოგადოებაც და ოპოზიციაც იძულებული და ვალდებულია, დასვას კითხვები.
როგორც ნადირაშვილმა ბრიფინგზე განაცხადა, "ქართული ოცნების" ახალი სახეების დანიშვნები განხორციელდა თებერვლის თვეში მაშინ, როცა მასშტაბური შემცირებები იყო თავდაცვის სამინისტროში და ბევრი კვალიფიციური ადამიანი დარჩა სამსახურის გარეშე.
"დღეს მინდა წარმოგიდგინოთ ორი ფაქტი თავდაცვის სამინისტროდან. უშუალოდ, წყარომ თავდაცვის სამინისტროდან გამოგვიგზავნა ბრძანება, რომელსაც ხელს აწერს თავდაცვის მინისტრი ლევან იზორია. საუბარია იმაზე, რომ „ქართული ოცნების“ დეპუტატის, ადამიანის უფლებების დაცვის კომიტეტის თავმჯდომარის სოფიო კილაძის მეუღლე ავთანდილ ხარაძე ლევან იზორიამ დანიშნა გენერალურ ინსპექციაში. ასევე, „ქართული ოცნების“ ახალი სახის, თამარ ხულორდავას მეუღლე ლევან ვახტანგაძე გენერალურ ინსპექციაში დაინიშნა.
ჩვენ გვაქვს კითხვები მინისტრთან, რა ნიშნით მოხდა ამ ადამიანების აყვანა თავდაცვის სამინისტროში, რა ნიშნით განახორციელა მინისტრმა ეს დანიშვნები. ჩვენ გვაქვს კითხვები კოლეგებთანაც, რა როლი შეასრულეს მათ მეუღლეების საჯარო სამსახურში მოწყობასთან დაკავშირბით. აღსანიშნავია, რომ ორივე მათგანი საჯარო სამსახურში მას მერე დაინიშნა, რაც მათი მეუღლეები „ქართული ოცნების“ ახალი სახეები გახდნენ. რაც განსაკუთრებით შემაშფოთებელია, ეს დანიშვნები განხორციელდა თებერვლის თვეში მაშინ, როცა მასშტაბური შემცირებები იყო თავდაცვის სამინისტროში და ბევრი კვალიფიციური ადამიანი დარჩა სამსახურის გარეშე“, - დასძინა ირმა ნადირაშვილმა.
