პარლამენტის თავმჯდომარემ ირაკლი კობახიძემ საქართველოში ვიზიტით მყოფი ესტონეთის საგარეო საქმეთა მინისტრი სვენ მიკსერი მიიღო.
ირაკლი კობახიძემ სტუმარს ესტონეთის მიერ საქართველოს სუვერენიტეტისა და ტერიტორიული მთლიანობის, ასევე ევროპული და ევრო-ატლანტიკური მისწრაფებების აქტიური მხარდაჭერისთვის მადლობა გადაუხადა. სვენ მიკსერმა აღნიშნა, რომ ესტონეთი მომავალშიც დარჩება საქართველოს მეგობრად და ახლო პარტნიორად. მისივე თქმით, ესტონეთი ევროკავშირის თავმჯდომარეობისთვის ემზადება და თავმჯდომარეობის პერიოდში ქვეყნისთვის პრიორიტეტი „აღმოსავლეთ პარტნიორობის" ფორმატი, მათ შორის, საქართველო იქნება.
შეხვედრაზე აღნიშნა, რომ წელს სრულდება საქართველოსა და ესტონეთს შორის დიპლომატიური ურთიერთობების დამყარებიდან 25 წელი. ირაკლი კობახიძემ განაცხადა, რომ საქართველოს პარლამენტი ყველაფერს გააკეთებს იმისთვის, რომ მნიშვნელოვანი წვლილი შეიტანოს ამ გამორჩეული თარიღის სათანადოდ აღსანიშნავად და ორ ქვეყანას შორის ურთიერთობების კიდევ უფრო გასაღრმავებლად.
მხარეებმა გაიხსენეს მიმდინარე წლის მარტში, ნორდიკულ-ბალტიური რვიანის წევრი ქვეყნების პარლამენტების თავმჯდომარეების ვიზიტის ფარგლებში ესტონეთის პარლამენტის თავმჯდომარის საქართველოში სტუმრობა. ასევე, აღინიშნა, რომ საქართველო მაისში, ნატოს საპარლამენტო ასამბლეის ფარგლებში, უმასპინძლებს ესტონეთის მაღალი დონის დელეგაციას.
პარლამენტის თავმჯდომარემ ისაუბრა ქვეყნაში მიმდინარე მნიშვნელოვან პროცესებზე. ირაკლი კობახიძემ ხაზი გაუსვა იმ ფაქტს, რომ საქართველოს პარლამენტმა მიიღო „საქართველოს საგარეო პოლიტიკის ძირითადი მიმართულებების შესახებ" რეზოლუცია. დოკუმენტში ქვეყნის სტრატეგიულ პრიორიტეტებს შორის მითითებულია ქვეყნის ევროკავშირსა და ნატოში გაწევრიანება, რაც წარმოადგენს არა მხოლოდ მთავრობის, არამედ საქართველოს მოსახლეობის სურვილს. პარლამენტის თავმჯდომარემ ასევე განაცხადა, რომ აღნიშნული პოლიტიკური და საზოგადოებრივი ნება გამყარდება შესაბამისი კონსტიტუციური ჩანაწერით.
ამასთან, ირაკლი კობახიძემ სტუმარს სახელმწიფო საკონსტიტუციო კომისის მუშაობა გააცნო. მისივე განმარტებით, საკონსტიტუციო რეფორმის ფარგლებში დაგეგმილი ცვლილებების მიზანია ქვეყნის გრძელვადიანი დემოკრატიული განვითარების და სტაბილურობის უზრუნველყოფა.
