„სასაცილოა, სატირალი რომ არ იყოს დავით ნარმანია. მისი უსუსურობა სახეზე იყო“-განაცხადა „პოლიტმეტრის“ ეთერში თბილისის საკრებულოს ფრაქცია „მოძრაობა თავისუფლებისთვის“ წევრმა თამაზ შოშიაშვილმა. მისი თქმით, ანგარიშის წარდგენისას დავით ნარმანიამ საკრებულოში თანამშრომლები მიიყვანა, რათა მათ ხმამაღლა ეყვირათ და ამგვარად ოპოზიციის ხმა გადაეფარათ.
„როგორც მითხრეს, ერთი იყო მერიის უსაფრთხოების სამსახურის თანამშრომელი, რომელიც ყველაზე მეტს ყვიროდა. მეორე იყო დიდუბის გამგეობის თანამშრომელი და ა.შ. მისი ქვეშევდომები, რომელიც მოიყვანა რომ ამოფარებოდა მათ, მოეწყოთ იქ შოუ და რაც შეიძლება ხმამაღლა ეხმაურათ“,-განაცხადა თამაზ შოშიაშვილმა.
მეორე მიწვეულმა სტუმარმა, „ქართული ოცნების“ წევრმა ჯაბა ჯიშკარიანმა კი დადებითად შეაფასა მერის გამოსვლა და მისი თქმით, დავით ნარმანიამ ყველა პრობლემურ კითხვას თავი გაართვა.
„ეს იყო ძალიან კარგი გამოსვლა, ეს იყო ძალიან კარგი ანგარიში ამ საანგარიშო პერიოდში. ვინაიდან ის მითი თუ მცდელობა, რომ დავით ნარმანია გაურბოდა კითხვებს და მას არ ჰქონდა პასუხები დაიმსხვრა. ამ ადამიანმა ძალიან კარგად ჩამოაყალიბა და უპასუხა აბსოლუტურად ყველა დასმულ შეკითხვას და გაამართლა მოლოდინები“,-განაცხადა ჯაბა ჯიშკარიანმა.
