საქართველოს კონსიტუტციის პროექტში გვაქვს ფუნდამენტური ცვლილება, რომელიც ეხება საპარლამენტო არჩევნების შერეული სისტემიდან პროპორციულ სისტემაზე გადასვლას და, რომელსაც აქვს მყარი დასაბუთება. ამის შესახებ საქართველოს პარლამენტის თავმჯდომარემ, ირაკლი კობახიძემ საკონსტიტუციო კომისიის დღევანდელ სხდომაზე განაცხადა.
როგორც კობახიძემ აღნიშნა, შემოთავზებული ვარიანტი არის საუკეთესო ბალანსი ორ ძირითად ინტერესს შორის, ეს არის პლურალიზმისა და სტაბილურობის ინტერესი.
მისივე თქმით, ახალი მოდელი გამორიცხავს საკონსტიტუციო უმრავლესობის ჩამოყალიბებას პარლამენტში.
„გვახსოვს, რომ წარსულში გარკვეული რისკები უკავშირდებოდა ერთი პარტიის ხელში საკონსტიტუციო უმრავლესობსი არსებობას. ეს არის ფუნდამენტური ცვლილება, რომელიც გვაქვს პროექტში“,-აღნიშნა კობახიძემ.
ამასთან, პარლამენტის თავმჯდომარის თქმით, არის უამრავი სხვა ცვლილება, რომელიც უკავშირდება პარლამენტის თავს.
„ახალი რედაქციით ჯეროვნად მოწესრიგებულია პარლამენტსა და მთავრობას შორის ურთიერთობები. ეს იყო ერთ-ერთი უმთავრესი სუსტი მხარე არსებული კონსტიტუციის და ეს საკითხები არის სათანადოდ მოწესრიგებული კონსტიტუციის ახალ რედაქციაში“,-განაცხადა ირაკლი კობახიძემ.
