მართვის მოწმობისთვის ქულათა მინიჭების სისტემა 1-ელი ივლისიდან ამოქმედდება, - ამის შესახებ გადაწყვეტილება იურიდიულ საკითხთა კომიტეტის სხდომაზე მიიღეს, სადაც შს სამინისტროს მიერ მომზადებული სანონმდებლო ცვლილებათა პაკეტი მეორე მოსმენით, მუხლობრივად განიხილეს.
მინისტრის მოადგილის შალვა ხუციშვილის განცხადებით, კანონის ამოქმედებამდე დარჩენილი პერიოდი გამოყენებული იქნება საინფორმაციო კამპანიისთვის. ასევე, 1-ელი ივლისიდან შევა ძალაში ე.წ. უკონტაქტო პატრულირებასთან დაკავშირებული ინიციატივაც.
პარლამენტში წარდგენილი პროექტით, ქულათა სისტემა მიენიჭება როგორც საქართველოში გაცემულ მართვის მოწმობას, ასევე უცხო ქვეყანაში გაცემულ მართვის მოწმობასაც.
განხილვის პროცესში ცვლილება განიცადა ქულათა სისტემამ - რიგი საგზაო დარღვევების შემთხვევაში ჩამოსაკლები ქულის ოდენობა გაიზარდა, ზოგ დარღვევაზე კი შემცირდა.
ქულების განულების შემთხვევაში მართვის მოწმობის მფლობელს მართვის უფლება 1 წლით შეუჩერდება და მის დასაბრუნებლად გამოცდის გავლა მოუწევს. ამასთან, პროექტით მძღოლს ეს უფლება წელიწადში ერთხელ ექნება. საკანონმდებლო პაკეტიდან ამოღებულია ინიციატივა მარჯვენასაჭიანი ავტომობილების იმპორტისა და რეგისტრაციის აკრძალვის შესახებ.
