საკომიტეტო მოსმენაზე უზენაესი სასამართლოს თავმჯდომარემ ოპოზიციისა და ჟურნალისტების შეკითხვებს არ უპასუხა.
„აცნობიერებთ თქვენ თუ არა, რა გამოწვევების წინაშე არის სასამართლო და ქვეყანა, როდესაც საქმე ეხება ,,რუსთავი2“ -ის საქმეს, როდესაც თქვენ გყავთ მოსამართლე ურთმელიძე და როდესაც თქვენ გყავთ მოსამართლე ნაზღაიძე, მაინტერესებს, ნაზღაიძის შემთხვევაში რამე რეაგირება მიეცით თუ არა იმ ამბავს, რაც მის გარშემოა?“- მიმართა სერგო რატიანმა ნინო გვენეტაძეს.
„მოსამართლეებზე საუბარია, რომ ზეწოლაა, პირველად ისტორიაში ხმამაღლა საუბრობენ მოსამართლეები, რომ მათზე ზეწოლა ხორციელდება, მაინტერესებს, თქვენ, როგორც უზენაესი სასამართლოს თავმჯდომარემ, რატომ დღემდე არცერთის საჯარო განცხადება არ გააკეთეთ,“- მიმართა კითხვით ნიკა მელიამ ნინო გვენეტაძეს.
ნინო გვენეტაძემ აღნიშნა, რომ სამართალწარმოების პროცესი ვიდრე არ დასრულდება კომენტარისგან თავს შეიკავებს, რადგან უზენაესი სასამართლოს თავმჯდომარის თქმით, სამოსამართლეო ეთიკა მას ამის საშუალებას არ აძლევს. გვენეტაძეს პარლამენტის ადამიანის უფლებათა დაცვის კომიტეტის თავმჯდომარემ მადლობა გადაუხადა, რის შემდეგაც უზენაესი სასამართლოს თავმჯდომარემ დარბაზი მოულოდნელად დატოვა. ნინო გვენეტძემ პასუხი არ გასცა ჟურნალისტებსაც.
ნინო გვენეტაძემ დეპუტატებს სახალხო დამცველის რეკომენდაციების შესრულების შესახებ უზენაესი სასამართლოსა და იუსტიციის უმაღლესი საბჭოს ანგარიშები გააცნო.
