სამაუწყებლო კომპანია რუსთავი 2-ის მხარდამჭერ აქციას, საპარლამენტო უმრავლესობის წევრები ეხმაურებიან. ქართულ ოცნებაში აცხადებენ, რომ მედია დღეს თავისუფალი და დამოუკიდებელია.
მმართველ პარტიაში გამორიცხავენ სასამართლო პროცესებში ჩარევას და ამბობენ, რომ ხელისუფლება თავადაც დაინტერესებულია, მათი მტკიცებით, მესაკუთრეთა დავაზე, უზენაესმა სასამართლომ ობიექტური გადაწყვეტილება მიიღოს.
„ხელისუფლება არ აპირებს და არავის აზრად არ მოსვლია შეზღუდოს სიტყვის თავისუფლება. მესაკუთრეთა შორის დავა, სასამართლოში როგორც არ უნდა გადაწყდეს, ეს არანაირ კავშირში არ არის არც ამ ტელევიზიის მაუწყებლობის შეჩერებასთან და არც ამ ტელევიზიის გამოხატვის თუ სიტყვის თავისუფლების შეზღუდვასთან. აბსოლუტურად არ არის ეს ერთმანეთთან კავშირში და მე მგონი, რომ ეს სპეკულაციები უნდა დასრულდეს,“ - განაცხადა ეკა ბესელიამ.
საპარლამენტო უმრავლესობის წევრების განცხადებით, ხელისუფლებისთვის მნიშვნელოვანია მედიისა და სიტყვის თავისუფლება, რაც მათი შეფასებით, გუშინდელმა აქციამაც დაადასტურა.
