ხმაურის საკანონმდებლო რეგულირებისა და ხმაურის ნორმების დარღვევისთვის პასუხისმგებლობის შესახებ ქალაქ თბილისის საკრებულომ პარლამენტში საკანონმდებლო წინადადება წარმოადგინა. საკანონმდებლო წინადადება საქართველოს ადმინისტრაციულ სამართალდარღვევათა კოდექსში შესაბამისი შინაარსის 771 მუხლის დამატებას ითვალისწინებს, რომელიც იურიდიულ საკითხთა კომიტეტის სამუშაო ჯგუფის წევრებთან ერთად, საქართველოს ბიზნეს ომბუდსმენმა, სახალხო დამცველმა, თბილისის მუნიციპალიტეტის საკრებულოს წევრებმა და არასამთავრობო ორგანიზაციის წარმომადგენლებმა განიხილეს.
პარლამენტის წევრის, ლევან გოგიჩაიშვილის განცხადებით, ჭარბი ხმაურის შედეგად ირღვევა ადამიანის კონსტიტუციური უფლება ცხოვრობდეს ჯანმრთელ და უვნებელ გარემოში. „ჩვენ უნდა ვიმსჯელოთ აღნიშნულ საკითხზე, რომ ერთად გადავწყვიტოთ ეს პრობლემა ისე, რომ ერთი მხრივ, დავიცვათ ადამიანის უფლებები და, მეორე მხრივ, არ დავაზარალოთ კერძო ბიზნესი და ხელი არ შევუშალოთ ქვეყნის ეკონომიკურ განვითარებას,“- განაცხადა ლევან გოგიჩაიშვილმა.
„ევროპაში შესვლა მხოლოდ ვიზალიბერალიზაცია არ არის, თუ ევროპული გზა ავირჩიეთ, ადამიანის უფლებები დაცული უნდა იყოს და საცხოვრებელი გარემო - ადამიანის ფიზიკური და ფსიქიკური ჯანმრთელობისთვის უვნებელი“, - აღნიშნა დეპუტატმა სალომე ზურაბიშვილმა.
საკანონმდებლო წინადადების მომზადების აუცილებლობა ბიზნეს ომბუდსმენის მოვალეობის შემსრულებელი ზურაბ ძნელაშვილიც მიიჩნევს. მისი თქმით, მოქალაქე, რომელსაც აქვს ნორმალური ძილისა და მოსვენების უფლება, არ უნდა იყოს შეწუხებული ხმაურით, მაგრამ მისივე მოსაზრებით, კარგი იქნებოდა საკანონმდებლო წინადადების ავტორს მოეხდინა რეგულირების გავლენის შეფასება აღნიშნულ საკითხზე.
სამუშაო ჯგუფის წევრებმა საზოგადოების იმ წარმომადგენლების მოსაზრებებიც მოისმინეს, რომლებიც პერმანენტული ხმაურით არიან შეწუხებული და რომელთა ოჯახის წევრების, განსაკუთრებით, ბავშვების ჯანმრთელობაზე მისი ზეგავლენა უარყოფითად აისახა. მოქალაქეებმა კანონპროექტის დროული მიღება და ამოქმედება მოითხოვეს. მომღერალი ლიზა ბაგრატიონი მიიჩნევს, რომ უკანონობაა ერთი ადამიანის ჯანმრთელობის შელახვის ხარჯზე მეორე გაერთოს ან ბიზნესი წარმართოს.
წარმოდგენილ დოკუმენტში დასაშვები და დაუშვებელი ხმაურის სიდიდე დეციბელებითაა განსაზღვრული, დასაშვები ნორმის ზემოთ არსებულ ხმაურზე კი შესაბამისი სანქციებია დაწესებული. ფიზიკური ან იურიდიული პირი, რომელიც გამოიწვევს დადგენილ ნორმაზე მეტ ხმაურს, პირველ ჯერზე მიიღებს გაფრთხილებას. სამართალდარღვევის ჩადენიდან 1 წლის განმავლობაში მისი განმეორება გამოიწვევს დაჯარიმებას: ფიზიკური პირის - 150 ლარის, ხოლო იურიდიული პირის - 500 ლარის ოდენობით. სამართალდარღვევის ყოველი შემდგომი გამეორება გაორმაგებულ დაჯარიმებას გამოიწვევს.
