კურორტ “გოდერძიზე” მიღებული ტრავმის შედეგად აჭარის ფინანსთა მინისტრის ყოფილი მოადგილე გარდაიცვალა.
როგორც ირკვევა, კურორტზე ყოფნისას თემურ გაბაიძე ფეხსაცმლის ზონარს იკრავდა, როდესაც სხვამ თხილამურებით გადაუარა. თემურ გაბაიძემ ქალა-ტვინის დაზიანება მიიღო.
როგორც გაზეთი „ბათუმელები“ გარდაცვლილის მეგობრზე დაყრდნობით წერს, დაზარალებულის ტრანსპორტირებას ბათუმამდე შვიდი საათი დასჭირდა. მეგობრის თქმით, კურორტზე არ არის უსაფრთხოების ნორმები დაცული, არ მუშაობს სამაშველო სამსახური და არც სამედიცინო დაწესებულება.
თემურ გაბაიძე ბათუმის რეფერალურ საავადმყოფოში დღეს, 13 იანვარს გარდაიცვალა.
თემურ გაბაიძე ბოლო პერიოდში შუახევი ჰესზე მუშაობდა. 2011-2012 წლებში კი აჭარის ავტონომიური რესპუბლიკის ფინანსთა და ეკონომიკის მინისტრის მოადგილე იყო.
აღნიშნულ ფაქრთან დაკავშირებით, დღეს განცხადება გაავრცელა აჭარის ფინანსთა და ეკონომიკის სამინისტრომ.
"აჭარის ფინანსთა და ეკონომიკის სამინისტრო უდიდეს მწუხარებას გამოთქვამს კურორტ „გოდერძზე“ მომხდარ ფაქტთან დაკავშირებით. სამინისტრო თანადგომას უცხადებს გარდაცვლილის ოჯახის წევრებს, ნათესავებს და მეგობრებს ამ უმძიმესი ტრაგედიის გამო. ტრაგიკულად დაღუპული პიროვნება აჭარის ფინანსთა და ეკონომიკის სამინისტროს ყოფილი თანამშრომელია, შესაბამისად უწყების თითოეული თანამშრომლისთვის მომხდარი ფაქტი განსაკუთრებით მძიმეა. ფაქტზე უკვე აღძრულია სისხლის სამართლის საქმე 116-ე მუხლით, მიმდინარეობს გამოძიება.
რაც შეეხება უსაფრთხოების ნორმებს კურორტ „გოდერძზე“: კურორტზე მოქმედებს პირველადი სამედიცინო დახმარების პუნქტი, სქი პატრული და საზოგადოებრივ წესრიგს შსს აჭარის ა.რ პოლიციის დეპარტამენტის ხულოს რაიონის სამმართველოს ჯგუფი იცავს.სათხილამურო ტრასების ტერიტორიაზე განთავსებულია გამაფრთხილებელი ნიშნები, დამცავი ბადეები, სათხილამურო ტრასების კონტურის აღმნიშვნელი ალმები. თუმცა კიდევ ერთხელ გვინდა აღვნიშნოთ, რომ მომხდარი საზარელი ტრაგედიაა და კიდევ ერთელ მწუხარებას გამოვხატავთ მომხდარ ფაქტთან დაკავშირებით", აღნიშნულია განცხადებაში.
