ბათუმში შინდისის გმირების ხსოვნისადმი მიძღვნილი ღონისძიება გაიმართა. საქართველოს თავდაცვის მინისტრის მოადგილემ, აჭარის მთავრობის თავმჯდომარემ ზურაბ პატარაძემ, აჭარის ა.რ მინისტრებმა, უმაღლესი საბჭოს თავმჯდომარემ ავთანდილ ბერიძემ, ბათუმის თვითმმართველობის წარმომადგენლებმა და საზოგადოების სხვა წევრებმა, 2008 წლის 11 აგვისტოს, სოფელ შინდისთან დაღუპული გმირების ხსოვნას პატივი მიაგეს.
სკვერში რუსეთ-საქართველოს ომის ამსახველი ფოტომასალა გამოიფინა. შინსდისთან დაღუპული 17 გმირის სახელზე პარკში 17 ნერგი დაირგო. ხეების დარგვის აქციაში აჭარის ფინანსთა და ეკონომიკის მინისტრმა რამაზ ბოლქვაძემ მიიღო მონაწილეობა.
2008 წლის 11 აგვისტოს, სოფელ შინდისის სარკინიგზო სადგურთან საქართველოს შეიარაღებული ძალების II ქვეითი ბრიგადის საინჟინრო ოცეული რუსულ მოტომსროლელ ასეულთან უთანასწორო ბრძოლაში ჩაება. ქართველი ჯარისკაცების მიმართულებით მტერი თითქმის ყველა სახის იარაღიდან ისროდა, მათ შორის ტანკებიდან და რეაქტიული ცეცხლმტყორცნებიდან და მიუხედავად იმისა, რომ მოწინააღმდეგემ ორჯერ გამოიძახა დახმარება, ჩვიდმეტმა ქართველმა მებრძოლმა მედგარი წინააღმდეგობა ბოლომდე გაწია და გმირულად დაიღუპა.
შინდისის გმირების სახელობის სკვერი ბათუმში მიმდინარე წლის აპრილში გაიხსნა. ევროსტანდარტების შესაბამისად მოწყობილი პარკი ოთხ ჰექტარზეა გაშენებული. აქვეა განთავსებული 150 მაყურებელზე გათვლილი სტადიონი, ადაპტირებული ატრაქციონები და პანდუსებიანი საპირფარეშო. გამწვანდა პარკის 7 ათასი კვმ ტერიტორია. პარკში განთავსებულია 90 საბაღე სკამი და სასმელი წყლის ფანტანები.
პარკის მშენებლობისთვის ქალაქის ბიუჯეტიდან მილიონ 902 ათასი ლარი დაიხარჯა.