,,მაესტროს“ ყოფილი დირექტორის ბაია გადაბაძის ინფორმაციით, გენერალური დირექტორის თანამდებობაზე დარეგისტრირებული ლევან გაჩეჩილაძე ტელეკომპანიის ჟურნალისტებს „მაესტროს“ შენობის სათათბირო ოთახში ელოდება. ამის შესახებ მან ჟურნალისტებს გაჩეჩილაძესთან შეხვედრის შემდეგ განუცხადა.
მისივე თქმით, ლევან გაჩეჩილაძეს სამი მოთხოვნა აქვს. მათ შორის ,,მაესტროს“ ჟურნალისტებთან შეხვედრა. გადაბაძე მოუწოდებს არხის ჟურნალისტებს, რომელთაც აქვთ სურვილი შეხვდნენ ახალ გენერალურ დირექტორს.
მისივე განმარტებით, გაჩეჩილაძის მოთხოვნებს შორის, ასევე, არის ის, რომ, თუკი დღეს ის ვერ მოხვდება არხის შენობაში, მიეცეს გონივრული ვადა, რათა შესაბამისი შენობა მოიძიოს. ასევე, ლევან გაჩეჩილაძე ითხოვს, რომ არ შეწყდეს „მაესტროს“ ეთერი.
,,კონკრეტული სახელები და გვარები, თუ ვის სურს შეხვედრა, ჩემთვის უცნობია. ზემოთ შენობაში ვერ ავა, რადგან ლევანმა თვითონვე თქვა, რომ არ აპირებს ძალადობას და ეს მისი მხრიდან სწორია. მან იცის, რომ შენობა "მაესტროს" საკუთრებაში არ არის. მანვე მოითხოვა გონივრული ვადა, რომ სხვა ალტერნატიული ფართი უზრუნველყოს. ასევე დღევანდელი შეხვედრის შემდეგ შემიძლია ვთქვა, რომ ეთერის უწყვეტობა იქნება უზრუნველყოფილი და გაჩეჩილაძე არ აპირებს არანაირი მონაწილეობის მიღებას საეთერო ბადესთან დაკავშირებით", - განაცხადა გადაბაძემ.
შეგახსენებთ, ტელეკომპანია „მაესტროს“ ჟურნალისტების განცხადებით, ისინი არხის სადაო 25 %-ის ირგვლივ სასამართლო დავის დასრულებამდე, არ გეგმავენ შპს „სტუდია მაესტროს" რეგისტრირებული დირექტორის ლევან გაჩეჩილაძის განკარგულებების შესრულებას.