პარლამენტის თავმჯდომარე დავით უსუფაშვილი აცხადებს, რომ
დაინტერესებულია მედიას ჰქონდეს ძალიან მყარი საფუძველი, როგორც სამართლებრივი, ისე ფინანსური, ,,რესპუბლიკელების“ ლიდერმა დღეს მედიასაშუალებეთან გამართულ შეხვედრაზე ,,მაესტროს“ ირგვლივ განვითარებულ მოვლენებს გამოეხმაურა და აღნიშნა ასევე, რომ ამ ტელეკომპანიას ისიც დაებედა, რომ სულ რაღაც შარშია.
,,ვიხმარ ამ ცოტა არ იყოს ჟარგონს, მაგრამ ამ ტელეკომპანიას ისიც დაებედა, რომ სულ რაღაც შარშია, სულ გაურკვეველი და სულ მოუგვარებელი საკითხები იყო მის გარშემო და ეს ძალიან ცუდია, რა თქმა უნდა, იმიტომ, რომ ჩვენ, ყველა დაინტერესებული ვართ, მედიას ჰქონდეს ძალიან მყარი საფუძველი, როგორც სამართლებრივი, ისე ფინანსური, ისე პარტნიორული, ჟურნალისტური, ხარისხი და ა.შ”, - განაცხადა უსუფაშვილმა.
მისივე თქმით, ნებისმიერი გადაწყვეტილება კარგად უნდა განემარტოს საზოგადოებას.
,,ნებისმიერი სხვა უფრო მეტი ჩარევა ჩემი მხრიდან ან ხელისუფლების მხრიდან რაიმე საკითხში, რომ შეფასებები - ეს მხარე უფრო მართალია, ის მხარე ნაკლებად მართალია - არის კონტრპროდუქტიული, განსაკუთრებით იმ შემთხვევაში, როდესაც მედიასაშუალებას ეხება საქმე. ამიტომ, მე მინდა ვისურვო, ვთხოვო, მივმართო ყველა იმ სახელმწიფო თანამდებობის პირს, ეს იქნება მოსამართლე, საჯარო რეესტრის თანამშრომელი, არ ვიცი, კიდევ სხვა - კონკრეტული სახელსუფლებო წარმომადგენელი, რომლებსაც ამა თუ იმ ფორმით შეხება აქვთ ამ საქმესთან, მარეგულირებელი კომისია და ასე შემდეგ, თავიანთი გადაწყვეტილებები მიიღონ რაც შეიძლება შემჭიდროებულ ვადებში და არა გახანგრძლივებულ ვადებში, გადაწყვეტილებები იყოს კარგად დასაბუთებული, კარგად ჩამოყალიბებული და ახსნილი, და რომ - დაემორჩილონ მხოლოდ კანონს და სხვა არაფერს", - აღნიშნა პარლამენტის თავმჯდომარემ.
საჯარო რეესტრმა ლევან გაჩეჩილაძე ტელეკომპანიის დირექტორად დაარეგისტრირა. ყოფილი დირექტორი და ,,მაესტროს“ მეწილეები არ აპირებენ გაჩეჩილაძეს ტელეკომპანიის სამართავად შენობა დაუთმონ. ,,მაესტროს“ შენობის დაცვა დღეს გააძლიერეს.
