პრეზიდენტის ადმინისტრაციასთან აქცია მიმდინარეობს, სადაც პატიმარი დედების, მათ შორის ოთხი შვილის დედის, თეა სირაძისა და რვა შვილის დედის, ციალა ჯანყარაშვილის შეწყალებას ითხოვენ.
"დემოკრატიის ინსტიტუტის" ხელმძღვანელმა ლაშა ჩხარტიშვილმა აქციაზე ასევე წარადგინა თეა სირაძის შეწყალების მხარდასაჭერად პრეზიდენტისადმი პეტიცია, რომელსაც 3 200-მდე პირი აწერს ხელს.
მისი თქმით, გაურკვეველია, რატომ ამბობს პრეზიდენტი უარს თეა სირაძის შეწყალებაზე, რომელსაც უკვე 6 წელი აქვს მოხდილი. მისივე თქმით, თეა სირაძე სასჯელს 5 მამაკაცის ცემისა და თაღლითობისათვის იხდის და მას 18 წელი აქვს მოსახდელი.
რაც შეეხება ციალა ჯანყარაშვილს, აქციის მონაწილეები აცხადებენ, რომ თაღლითობის ბრალდებით მას 11 წელი აქვს მისჯილი, რომლისგანაც 4 უკვე მოიხადა.
აქციაზე წარმოდგენილია ბანერები: ,,დავუბრუნოთ დედები ოჯახებს და შვილებს", "პრეზიდენტო, შეიწყალე პატიმარი დედები".
