კომპანია "საქნახშირი ჯი-აი-ჯი" წუხელ, ტყიბულში განვითარებულ მოვლენებს ეხმაურება. კომპანია ამასთან დაკავშირებით განცხადებას ავრცელებს, სადაც ნათქვამია, რომ გაფიცულმა მაღაროელებმა კერძო საკუთრება ვანდალურად დაარბიეს.
,,ტყიბულში ვითარება უკიდურესად დაიძაბა. კომპანია "საქნახშირი ჯი-აი-ჯი" ჯგუფის მიმდებარე ტერიტორიზე მიმდინარე აქციის მონაწილეთა გარკვეულმა ჯგუფმა შეძლო შეღწევა ჯერ კომპანიის ეზოში, შემდეგ შეიჭრა ადმინისტრაციულ კორპუსში. მოხდა კერძო საკუთრების ვანდალური დარბევა და ხელყოფა.
„ჯი-აი-ჯი ჯგუფი“ ყველა კანონიერ ზომას მიმართვას, რათა დაცული იქნას წესრიგი, კერძო საკუთრების უფლებები და დაისაჯონ დამნაშავეები", - ნათქვამია განცხადებაში.
საზოგადოებრივი წესრიგის უზრუნველყოფის მიზნით, შახტის ადმინისტრაციის შენობასთან, ტყიბულის პოლიციის რაიონული სამმართველოს თანამშრომლები იმყოფებიან.
შსს-ს ინფორმაციით, ტყიბულის რაიონულ პოლიციაში შევიდა შეტყობინება, რომ შახტის ადმინისტრაციის წინ შეკრებილმა მოქალაქეებმა, რომელთა ნაწილიც ალკოჰოლური ზემოქმედების ქვეშ იმყოფებოდა შენობის ფანჯრები დააზიანეს და ადმინისტრაციის შენობაში შეიჭრნენ.
უწყების ინფორმაციით, ამ დროისთვის სიტუაცია კონტროლს ექვემდებარება. დაკავებულთა შესახებ გავრცელებული ინფორმაცია კი, არ დასტურდება.
ტყიბულში ვითარება მას შემდეგ დაიძაბა, რაც კომპანია „საქნახშირმა“ დასაქმებულებს ხელფასების გადახედვა ორი თვის ვადაში შესთავაზა და გაცდენილი სამუშაო საათების ანაზღაურების პირობაც მისცა. ეს წინადადება მათთვის მიუღებელი აღმოჩნდა.