"თავისუფალი დემოკრატები" მთავრობას მიწის რეგისტრაციის შესახებ კანონპროექტის პარლამენტიდან გატანისკენ კიდევ ერთხელ მოუწოდებენ. პარტიის ერთ-ერთმა ლიდერმა, გია ცაგარეიშვილმა დღეს გამართულ პრესკონფერენციაზე განაცხადა, რომ იუსტიციის სამინისტროში დევს USAID-ის მხარდაჭერილი მაშტაბური პროექტი, რომელიც ითვალისწინებს მიწის რეფორმას.
,,ამ პროექტზე დაიხარჯა უზარმაზარი ადამიანური და ფინანსური რესურსი. რატომ მალავს იუსტიციის სამინისტრო ამ პროექტს, გაუგებარია. ახლა მთავარია საქართველოს მოსახლეობის ინტერესებიდან გამომდინარე, ერთად ვიმსჯელოთ და შევქმნათ ისეთი კანონი, რომელიც, პირველ რიგში, მიწის მფლობელებზე იქნება გათვლილი და არ იქნება მოსახლეობისთვის ფულის გამოძალვის მექანიზმი", - განაცხადა ცაგარეიშვილმა.
მისი ინფორმაციით, ინფორმაციით, საქართველოს პარლამენტის საორგანიზაციო დეპარტამენტში მიწის რეგისტრაციასთან დაკავშირებული კანონპროექტის გაწვევის შესახებ მოთხოვნა დარეგისტრირებული არ არის.
"ჩვენს მიერ საერთაშორისო ორგანიზაციებთან და სამოქალაქო სექტორთან გამართული კონსულტაციები ცხადყოფს, რომ მიწის რეგისტრაციის საკითხების მიმართ საჭიროა სისტემური მიდგომა. მოსამზადებელია საკანონმდებლო ინიციატივების პაკეტი, რომელიც საბოლოოდ მოაწესრიგებს ამ ურთულეს პრობლემას და არა ისეთი ფრაგმენტული ცვლილება, რომელიც წარმოდგენილია კანონის პროექტის ავტორების მხრიდან საქართველოს პარლამენტში”, - განაცხადა დეპუტატმა.
მისივე თქმით, "ნაციონალურ მოძრაობასაც" და "გირჩსაც" 9 წელი ჰქონდათ იმისთვის, რომ მიწის რეფორმა გაეტარებინათ.
,,არ არის საჭირო გასწრობანას თამაში - ვინ ვის მოასწრებს პარლამენტში ალტერნატიული კანონის შეტანას. "ნაციონალურ მოძრაობასაც" და "გირჩსაც" 9 წელი ჰქონდათ იმისთვის, რომ მიწის რეფორმა გაეტარებინათ, ეზრუნათ გლეხზე და იმ ნახევარ მილიონ მიწის მესაკუთრეზე, ვისაც დღეს პრობლემა ექმნება", - განაცხადა ცაგარეიშვილმა და დასძინა, რომ "თავისუფალმა დემოკრატებმა" პრემიერ-მინისტრს კანონპროექტის პარლამენტიდან გათხოვნის შესახებ მოთხოვნა ერთი კვირის წინ გაუგზავნეს.