სოფლის მეურნეობის სამინისტროსა და აშშ-ის საერთაშორისო განვითარების სააგენტოს (USAID) მიერ დაფინანსებული პროექტის ,,ექსტენციის და საკონსულტაციო მომსახურების გაძლიერება საქართველოში“ (SEAS) ორგანიზებით, 22-24 თებერვალს
„ექსტენციის ეროვნული ფორუმი“ იმართება. ფორუმის მიზანია ექსტენციის და საკონსულტაციო მომსახურების პოლიტიკის და სტრატეგიის დაგეგმვასა და შემუშავებაში სოფლის მეურნეობის სამინისტროს მხარდაჭერა. ეს ხელს შეუწყობს საქართველოში სასოფლო-სამეურნეო პრაქტიკის გაუმჯობესებას და ფერმერების განათლების ამაღლებას.
ღონისძიება სოფლის მეურნეობის მინისტრის პირველმა მოადგილემ, ნოდარ კერესელიძემ და USAID-ის მისიის დირექტორის მოადგილემ, თომას მორისმა გახსნეს.
„ექსტენცია ეს არის უმნიშვნელოვანესი მიმართულება სოფლის მეურნეობის განვითარებისთვის. რაც გულისხმობს ფერმერისთვის ცოდნის, გამოცდილების, თანამედროვე ტექნოლოგიების, ახალი ჯიშების თუ ახალი მეთოდების შესახებ ინფორმაციის გაზიარებას. სწორედ ამიტომ, 2013 წელს სოფლის მეურნეობის სამინისტროს ინიციატივით ქვეყნის მასშტაბით ყველა მუნიციპალიტეტში საინფორმაციო-საკონსულტაციო სამსახურები შეიქმნა. აღნიშნულ ფორუმზე განვიხილავთ ახალ სტრატეგიას, რომელიც სამინისტროს შეიმუშავა საინფორმაციო-საკონსულტაციო ცენტრების გაძლიერებისა და განვითარებისთვის. ახალი სტრატეგია გულისხმობს ექსტენციის სისტემის რეფორმის მეორე ეტაპს, რომელიც რეგიონალური ცენტრების გააქტიურებას, მეტი ფუნქციით აღჭურვას და ფერემერებისთვის მსოფლიო პრაქტიკის გაზიარებას გულისხმობს“, - აღნიშნა ნოდარ კერესელიძემ.
USAID-ის მისიის დირექტორის მოადგილის განცხადებით, USAID-ი სოფლის მეურნეობის სამინისტროსთან მჭიდროდ თანამშრომლობს და დარგის განვითარებისთვის არაერთ მნიშვნელოვან და წარმატებულ პროექტს ახორციელებს. პროექტის ,,ექსტენციის და საკონსულტაციო მომსახურების გაძლიერება საქართველოში“ (SEAS) ფარგლებში ფერმერებს საშუალება ეძლევათ გახდნენ უფრო წარმატებულები, გაიუმჯობესონ მატერიალური მდგომარეობა და ცხოვრების პირობები. USAID-ი ხელს უწყობს საქართველოში სოფლის მეურნეობის დარგის განვითარებას, ადგილობრივი პროდუქციის სტანდარტების შესაბამისობას ევროკავშირის სტანდარტებთან და ექსპორტის ზრდას“, - აღნიშნა ტომას მორისმა.
ფორუმში მონაწილეობას იღებდა საქართველოში სოფლის მეურნეობის განვითარებით დაინტერესებული ყველა მხარე - ფერმერთა ასოციაციები, სასოფლო-სამეურნეო კოოპერატივების წევრები, ექსტენციის განმახორციელებელი კერძო და სახელმწიფო ორგანიზაციები, არასამთავრობო ორგანიზაციები და საგანმანათლებლო ინსტიტუტები (უმაღლესი და პროფესიული განათლება). აღნიშნული ფორუმი წარმოადგენს უნიკალურ პლატფორმას, სადაც ყველა დაინტერესებული მხარე საქართველოში ექსტენციის მომსახურების განვითარებისთვის მნიშვნელოვან საკითხებზე იმსჯელებს. ექსტენციის და საკონსულტაციო მომსახურების გაძლიერება ხელს შეუწყობს სოფლის მეურნეობის მდგად განვითარებას და ინკლუზიურ ეკონომიკურ ზრდას, რაც საქართველოს მოსახლეობას მნიშვნელოვან სარგებელს მოუტანს.
ფორუმს ესწრებოდნენ ისრაელის საგანგებო და სრულუფლებიანი ელჩი საქართველოში იუვალ ფუქსი, სოფლის მეურნეობის სამინისტროს, განათლებისა და მეცნიერების სამინისტროს, სოფლის მეურნეობის სამეცნიერო-კვლევითი ცენტრის, სოფლის მეურნეობის სამინისტროს რაიონული საინფორმაციო-საკონსულტაციო სამსახურების წარმომადგენლები.