კონკურენციის სააგენტო განცხადება ტელეკომპანია „მაესტროს“ წილების შესყიდვასთან დაკავშირებით განცხადებას ავრცელებს, რომელსაც ,,ჯი-ეიჩ-ენი“ უცვლელად გთავაზობთ:
,,მაღალი საზოგადოებრივი ინტერესისა და მასობრივი ინფორმაციის საშუალებებით გავრცელებული მრავალი განცხადების გათვალისწინებით, კონკურენციის სააგენტო საჭიროდ თვლის განმარტოს, რომ ტელეკომპანია „მაესტრო“-ს წილების შესყიდვასთან დაკავშირებით სააგენტოში რაიმე ტიპის განცხადება დღემდე არ არის წარმოდგენილი. აქვე, აუცილებელია აღინიშნოს, რომ ხსენებული განცხადების წარმოდგენის შემთხვევაშიც კი, სააგენტო მოკლებულია მსგავსი საკითხების განხილვის სამართლებრივ საფუძველს, შემდეგი გარემოებების გათვალისწინებით: „კონკურენციის შესახებ“ საქართველოს კანონის მე-111 პრიმა მუხლის პირველი პუნქტით დადგენილია ეკონომიკური აგენტების მიერ კონცენტრაციის თაობაზე, სააგენტოსთვის შეტყობინების ვალდებულების წარმოშობის კრიტერიუმები, სადაც ცალსახად არის მითითება იმის თაობაზე, რომ კონცენტრაციის შეტყობინების ვალდებულება ეკონომიკის რეგულირებადი სფეროს ეკონომიკურ აგენტებს არ გააჩნიათ. თავის მხრივ, ამავე კანონის მე-3 მუხლის „რ“ ქვეპუნქტში განმარტებულია, რომ „მაუწყებლობის შესახებ“ საქართველოს კანონით განსაზღვრული სფერო განეკუთვნება ეკონომიკის რეგულირებად სფეროს”, ნათქვამია განცხადებაში.
შეგახსენებთ, მაკა ასათიანის ადვოკატმა, კონკურენციის სააგენტოს "მაესტროს" საქმის შესწავლას სთხოვა. შესაბამისი განცხადება სააგენტოში გიორგი გვენეტაძმე გუშინ წარადგენს. როგორც ადვოკატი განმრტავს, ტელეკომპანია "იმედის" მენეჯერმა, კონკურენტ ტელევიზიაში წილის 30 პროცენტი შეიძინა, რასაც კონკურენციის სააგენტომ სამართლებრივი შეფასება უნდა მისცეს.
"ჩვენთვის, რეალურად მხარე გახდა ბატონი ირაკლი რუხაძე. ჩვენ ვაგრძელებთ სამართლებრივ ბრძოლას, დღეს შევიტანთ კონკურენციის სააგენტოში განცხადებას. ვიმედოვნებით, რომ სააგენტო ჩვენი საჯარო განცხადების საფუძველზე მოახდენდა რეაგირებას, თუმცა როგორც გავარკვიეთ, რეაგირება ჯერ არ მომხდარა. ასე რომ ჩვენ წარვუდგენთ დოკუმენტაციას და ვთხოვთ რომ დაიწყოს შესწავლა. ტელეკომპანია "იმედთან" დაკავშირებულმა პირმა და მისმა ფაქტობრივმა მენეჯერმა, შეიძინა 30 პროცენტი კონკურენტ ტელევიზიაში და ამას უნდა მოყვეს სამართლებრივი შეფასება სააგენტოს მიერ“, - განაცხადა ადვოკატმა.
