ციხისძირში გიგანტური ხეების გადანერგვის პროცესი დროებით შეჩერდება, - ამის შესახებ ყოფილმა პრემიერ-მინისტრმა ბიძინა ივანიშვილმა, საპროტესტო აქციის მონაწილეებთან შეხვედრაზე განაცხადა.
"ნაციონალური მოძრაობის" წევრები ბიძინა ივანიშვილისგან ელოდებიან ხეების გადანერგვაზე დოკუმენტაციის წარმოდგენას.
,,საუბარი მიდის დოკუმენტაციაზე, რომ არ არის მოწესრიგებული. მე ამას ვნახავ მეორე მხრიდან. მანამდე ვაჩერებთ სამუშაოებს და სანამ დოკუმენტაცია არ იქნება წესრიგში, არაფერი სამუშაოები არ გაგრძელდება. აქვე გპირდებით, რომ ბუნებას აღვადგენთ და აღვადგენთ იმაზე უკეთესად, ვიდრე იყო. ერთი ხის ადგილზე, მინიმუმ, ათს დავრგავ და პარკს ამით არაფერი დააკლდება", - აღნიშნა ივანიშვილმა.
მისივე თქმით, ხეები კომპანია ,,ზომომ“ შეიძნა.
"ეს ხეები ნაყიდი მაქვს, კომპანიამ "ზიმომ" შეიძინა, რომელსაც ჩემთან აქვს კავშირი", - აღნიშნა ყოფილმა პრემიერმა.
აქციის მონაწილეებმა მას უთხრეს, რომ პოლიცია მის დაკვეთას ასრულებს , აქციის წევრებს პროტესტის გამოხატვის საშუალებას არ აძლევს, უხეშად ერევა დემონსტრანტების პროტესტში და აპატიმრებს.
ამასთან დაკავშირებით, ივანიშვილმა განაცხადა, რომ მას არანაირი კავშირი ამ საკითხთან დაკავშირებით არ აქვს.
