მსოფლიო საეკლესიო კრებისთვის მოსამზადებელი სამუშაოები განიხლეს დღეს სინოდის სხდომაზე. გორისა და ატენის მიტროპოლიტმა ანდრია გვაზავამ ჟურნალისტებტან განაცხადა, რომ წმინდა სინოდის სხდომაზე ერთადერთი საკითხი განიხილეს, რომელიც მართლმადიდებელი ეკლესიების წმინდა და დიდი კრების ჩატარებას ეხებოდა.
"განხილული იქნა დოკუმენტები, რომელსაც წმინდა და დიდ კრებაზე გაიტანენ. რეგლამენტის საკითხი და ასევე შამბეზის იანვრის შეხვედრაზე მიღებული დადგენილება, რომელიც ეკლესიების წინამძღოლებმა მიიღეს. მინდა მოგახსენოთ, რომ დოკუმენტებთან დაკავშირებით სხვადასხვა აზრი არის გამოთქმული და ზოგიერთი დოკუმენტი მოითხოვს ჩასწორებას", - განაცხადა მეუფე ანდრიამ.
მისივე თქმით, საზოგადოება ინფორმირებული იქნება რომელი დოკუმენტი მოითხოვს ჩასწორებას.
მისი ინფორმაციით, დელეგაციის შემადგენლობა განსაზღვრული არ არის, მხოლოდ ცნობილია, რომ დელეგაციაში 24 მღვდელთმთავარი, 6 მრჩეველი (ეს შეიძლება იყოს სასულიერო და საერო პირი) და სამი დამხმარე იქნება. ასევე მიღებული იქნა გადაწყვეტილება მასმედიის საშუალებებზე, რომლებიც მიიღებენ მონაწილეობას კრებაზე დასასწრებად.
მისივე თქმით, წმინდა სინოდის კრების განჩინება კი, უახლოეს პერიოდში გამოქვეყნდება. დღევანდელ სინოდის სხდომას საქართველოს კათოლიკოს-პატრიარქი ილია მეორე ხელმძღვანელობდა.
