განათლებისა და მეცნიერების მინისტრი, თამარ სანიკიძე აცხადებს, რომ პეტიციის - "განგაშის ზარების" თემას აუცილებლად გაშლის და დაასაბუთებს, რომ ადგილი აქვს ცილისწამებას. მინისტრი არ გამორიცხავს, რომ საკითხი სასამართლოში გაასაჩივროს.
"მე ამ თემას აუცილებლად გავშლი და როგორც კი მე ამას დავასაბუთებ, რაც ძალიან მარტივია, ვინაიდან არსებობს საგნის სტანდარტი, რომლის წაკითხვა შეუძლია ყველას, ვინც წერა-კითხვა იცის, თუ საჭირო გახდა, სასამართლოსაც მივმართავ იმ ცილისწამებისთვის, რომელიც ჩვენ ვისმინეთ და რომელიც ასმენინეს სრულიად საზოგადოებას", - განაცხადა სანიკიძემ.
პეტიციას - "განგაშის" ზარები" ხელს აწერენ საზოგადოების ცნობილი წევრები და ითხოვენ, სკოლებში ახალი საგნები "მე და საზოგადოება" და "ჩემი საქართველოა" არ შეიტანონ. პეტიციაში აღნიშნულია, რომ "განათლების სამინისტრო ევროკავშირის დავალებით სექტემბრიდან ჩვენ შვილებზე მასირებული შეტევის განხორციელებას აპირებს, ახალი სავალდებულო საგნების "მე და საზოგადოება" და "ჩემი საქართველოა" მიზანი იქნება დაწყებით კლასებში, 7-13 წლამდე ბავშვების, ერთი მხრივ, ბილწი და უსაშინლესი ცნობიერებით მოწამვლა, გარყვნა და, მეორე მხრივ, მათი სარწმუნოებრივ-ეროვნული ცნობიერების გადაგვარება და აღრევა".