კოალიცია "დამოუკიდებელი მართლმსაჯულებისთვის" იუსტიციის უმაღლესი საბჭოს მიერ მოსამართლეების დანიშვნაზე მორატორიუმის გამოცხადებას ითხოვს. არასამთავრობო ორგანიზაცია "სამართლიანი არჩევნების" იურიდიულმა კონსულტანტმა ნინო ლომჯარიამ განაცხადა, რომ კოალიცია ასევე შექმნის ელექტრონულ პეტიციას, რომელშიც მოსახლეობას შეუძლია ხმის მიცემა.
"კოალიცია "დამოუკიდებელი მართლმსაჯულებისთვის" ვიწყებთ კამპანიას იმისათვის, რომ დაუყოვნებლივ შეჩერდეს მოსამართლეთა დანიშვნის პროცედურები იუსტიციის უმაღლეს საბჭოში იქამდე, ვიდრე არ შეიცვლება კანონი საქართველოს კონსტიტუციის შესაბამისად. ამისათვის ვიწყებთ ფართომასშტაბიან საზოგადოებრივ კამპანიას. იქნება ასევე ელექტრონული პეტიცია, რომელსაც შესაძლებელია შემოუერთდეს ნებისმიერი მოქალაქე. გარდა ამისა, იმისათვის რომ იურიდიული მხრიდანაც ვიდავოთ, საკონსტიტუციო სასამართლოში შეტანილია საჩივარი იმ ნორმების არაკონსტიტუციურობასთან დაკავშირებით, რომლითაც ინიშნებიან მოსამართლეები. ვითხოვთ, რომ საკონსტიტუციო სასამართლომ რაც შეიძლება მალე შეაჩეროს ამ ნორმების მოქმედება მანამ, სანამ კანონმდებლობა არ იქნება შეცვლილი. წინააღმდეგ შემთხვევაში მიგვაჩნია, რომ ის არსებული პროცედურა, რის საფუძველზეც ინიშნებიან მოსამართლეები, არაკანონიერი და არაკონსტიტუციურია", - განაცხადა ნინო ლომჯარიამ.