ციხისძირში დღეს კიდევ ერთი საპროტესტო აქცია გაიმართება. რამდენიმე არასამთავრობო ორგანიზაცია, მათ შორის,,ახალგაზრდა იურისტები“ და ,,პარტიზანი მებაღეები“ ყოფილი სანერგე მეურნეობის ტერიტორიისთვის რეკრეაციული ზონის სტატუსის მინიჭებას და მასზე ნებისმიერი სახის მშენებლობის აკრძალვას მოითხოვს.
პარალელურად, ციხისძირში გაშლილ კარვებში ღამეს ათევენ,,ნაციონალური მოძრაობის“ წევრები. ამ ფორმით ისინი ასწლოვანი ხეების ამოთხრას აპროტესტებენ, რომელიც აჭარის სანაპიროდან ბიძინა ივანიშვილის ურეკის რეზიდენციაში გადააქვთ.
ოპოზიციაში ამბობენ, რომ აქციები გაგრძელდება იქამდე, ვიდრე დაწყებული პროცესი არ შეწყდება.
შეგახსენებთ, აჭარის მთავრობამ გასული წლის 31 დეკემბერს გამოსცა ბრძანება N431, რომლითაც ციხისძირის ყოფილ სანერგე მეურნეობაში არსებული სამი ძირი გიგანტური ხის ამოღების უფლება კერძო კომპანიას – „შპს ზიმოს“ გადასცა. ,,ბათუმელების“ ინფორმაციით, შპს „ზიმოს“ 6200 ლარად, საკუთრებაში გადაეცა ერთი ერთეული ტიტას ხე (l.irliodendrontulipifera) და ორი ერთეული ჭაობის კიპარისის ხე. „აღნიშნული ხემცენარეები კომპანიას გადაეცა ოზურგეთის ტერიტორიაზე მიმდინარე მასშტაბური პროექტის განხორციელების ხელშეწყობის მიზნით, რომელიც ქვეყნისათვის და უშუალოდ ამ რეგიონისათვის განვითარების მნიშვნელოვან კომპონენტს წარმოადგენს“, – წერია აჭარის მთავრობის მიერ გავრცელებულ ინფორმაციაში.
