მთავრობის ინიციატივით, მიწის ნაყოფიერი ფენის ექსპორტი შეიზღუდება. ამასთან დაკავშირებით საკანონმდებლო ინიციატივის წარდგენას მთავრობა პარლამენტისთვის საგაზაფხულო სესიაზე გეგმავს. ეს საკითხი მოხვდა იმ ინიციატივების ჩამონათვალში, რომელთა შესახებაც მთავრობა პარლამენტისთვის კანონპროექტების წარდგენას გეგმავს. კონკრეტულად ამ საკითხთან დაკავშირებით კი ცვლილების განხორციელება “ნიადაგის დაცვის შესახებ” კანონში იგეგმება.
პროექტი პარლამენტს გარემოს დაცვისა და ბუნებრივი რესურსების დაცვის სამინისტროს ავტორობით წარედგინება.
როგორც პარლამენტში შეტანილ დოკუმენტშია აღნიშნული, მოქმედი კანონმდებლობა ნიადაგის ნაყოფიერი ფენის რეკულტიცავიის მიზნით გადაცემასთან და ნიადაგის ექსპორტთან დაკავშირებულ საკითხებს არ არეგულირებს. მთავრობის განმარტებით, „იმის გათვალისწინებით, რომ ნიადაგის ნაყოფიერი ფენა ერთ-ერთი ყველაზე ძვირადღირებული და რთულად აღდგენადი ბუნებრივი რესურსია, დაუშვებელია მისი დიდი ოდენობით ქვეყნიდან გატანა, რათა დეგრადირებული ფართობების გაზრდა არ მოხდეს“.
შესაბამისად, მთავრობა მიიჩნევს, რომ ამ მიმართულებოით გარკვეული შეზღუდვების დაწესება საჭირო.
„დასარეგულირებელია უკანონოდ მოხსნილი ნიადაგის ნაყოფიერი ფენის შემდგომი განკარგვის საკითხი, ასევე დაზუსტებას საჭიროებს “ნიადაგის” ცნების განმარტება. კანონპროექტის მიზანია, ინფრასტრუქტურული პროექტების განხორციელების შედეგად მოხსნილი და დასაწყობებული ნიადაგის ნაყოფიერი ფენა გამოყენებულ იქნას სხვა ტერიტორიის რეკულტივაციისათვის გამოყენების არეალების გათვალისწინებით. ამასთან, კანონპროექტით იზღუდება ნიადაგის ნაყოფიერი ფენის ექსპორტი, გარდა ნიადაგის საანალიზოდ აღებული ნიმუშების ლაბორატორიული კვლევის მიზნისა,” - ნათქვამია მთავრობის მიერ პარლამენტში შეტანილ დოკუმენტში.