თბილისის მერიის განათლების, სპორტისა და ახლგაზრდულ საქმეთა საქალაქო სამსახურის უფროსმა ირაკლი გვილავამ გასული წელი შეაჯამა. 2015 წლის ანგარიშის პრეზენტაციას თბილისის მერი დავით ნარმანია მერიისა და საკრებულოს წევრებთან ერთად დაესწრო.
ანგარიშის მიხედით, ევროპის ახალგაზრდული ოლიმპიური ფესტივალის, „თბილისი 2015“- ის ფარგლებში აშენდა 5 სპორტული ობიექტი, 2 სპორტულ ობიექტს კი სრული რეაბილიტაცია ჩაუტარდა. ასევე, გასულ წელს თბილისმა უეფა-ს სუპერთასს უმასპინძლა. ღონისძიების ფარგლებში მოხდა ,,დინამო არენას’’ სრული რეაბილიტაცია. ასევე, დაგეგმილია კომენტირების ახალი სისტემის დანერგვა, რომლის მეშვეობითაც უსინათლო და მცირემხედველ გულშემატკივრებს მატჩის სრულად აღქმის შესაძლებლობა მიეცემათ.
გარდა ამისა, 2015 წელს გაიხსნა თბილისის პარასპორტის განვითარების ცენტრი, რომელსაც ამიერკავკასიაში ანალოგი არ აქვს. სპორტული კომპლექსი შშმ პირებისათვის მთლიანად ადაპტირებულია.
ანგარიშის მიხედვით, სპორტის მიმართულებით ქონების გადასახადი 2015 წელს 1000-ჯერ შემცირდა. მწვრთნელთა მხარდაჭერის პროგრამის ფარგლებში, შემუშავდა ახალი დებულება, შედეგად ბიუჯეტიდან 380 000 ლარი დაიზოგა.
დავით ნარმანიას განცხადებით, 2015 წელი გამორჩეული იყო სპორტული და ახალგაზრდული ღონისძიებების თვალსაზრისით. „დედაქალაქში ჩატარდა ევროპის ახალგაზრდული ოლიმპიური ფესტივალი, უეფას სუპერთასის ფინალი, ჭადრაკის გრან-პრი და ა.შ. ძალიან ბევრი ღონოსძიება ჩატარდა სპორტისა განვითარებისა და ახალგაზრდებისათვის ჯანსაღი გარემოს შესაქმნელად. წელს კიდევ უფრო მეტი ადგილობრივი და საერთაშორისო ღონისძიება ჩატარდება დედაქალაქში. ვიწყებთ ახალგაზრდული ცენტრის მშენებლობას, მოეწყობა ახალი და აღდგება ძველი სპორტული მოედნები. გვინდა, უფრო მეტად შევუწყოთ ხელი სპორტის განვითარებას და ახალგაზრდებისთვის კიდევ უფრო ჯანსაღი გარემო შევქმნათ“ განაცხადა თბილისის მერმა.
განათლების, სპორტისა და ახლგაზრდულ საქმეთა საქალაქო სამსახურის უფროსის, ირაკლი გვილავას განცხადებით, 2015 წელს მიღებული ახალი წესის შესაბამისად, სოციალურად დაუცველი სტუდენტები სწავლის 100%-იან დაფინანსებას მიიღებენ. ასევე, დაინერგა წარმატებული სტუდენტების წახალისების პროგრამა - მაგისტარტურის მაღალი აკადემიური მოსწრების სტუდენტები მერიის მუნიციპალური სტიპენდიას მიიღებენ. ამასთან, ,,ინკლუზიური განათლების ხელშეწყობის’’ პროგრამის ფარგლებში სამსახურმა შეიძინა ადაპტირებული ტრანსპორტი, რომელიც განსაკუთრებული საჭიროების მოსწავლეებს მოემსახურება.
2015 წელს რაჭაში შაორის ტბის მიმდებარე ტერიტორიაზე თბილისის მერიის ახალგაზრდული ბანაკი მოეწყო, რომელმაც 1000-მდე სტუდენტს უმასპინძლა.
ანგარიშის წარდგენასთან ერთად, ირაკლი გვილავამ სამომავლო გეგმებზეც ისაუბრა. მისი თქმით, მომავალ წელს დაგეგმილია ინფრასტრუქტურული ობიექტების მშენებლობა. აშენდება სამი სარაგბო სტადიონი, რომელიც თანამედროვე სტანდარტების შესაბამისად მოეწყობა. ასევე, 2016 წელს დაიწყება ახალგაზრდული ცენტრის მშენებლობა, რომელიც 2017 წელს დასრულდება.