პრემიერ-მინისტრის გიორგი კვირიკაშვილის განცხადებით, 2016 წლის ბოლოს თბილისში გვექნება განახლებული რაიონი, ახალი საფეხმავლო სივრცეებით, კაფე-ბარებით და ლამაზი ბაღებით. ამის შესახებ პრემიერმა თბილისის მერიის ახალი პროექტის "ახალი ტფილისის" პრეზენტაციაზე სიტყვით გამოსვლისას განაცხადა.
მისი თქმით, პროექტში ჩართულია 200-ზე მეტი პროფესიონალია და კიდევ უფრო მეტი - არქიტექტორები, ისტორიკოსები, რესტავრატორები, ურბანისტები, ხელოვნებათმცოდნეები ჩაერთვება.
მისივე თქმით, პროექტის ფარგლებში მოხდება არა მხოლოდ ფასადების აღდგენა, არამედ განახლდება საინჟინრო და საკომუნიკაციო ინფრასტრუქტურა. პრემიერი მიიჩნევს, რომ ეს პროექტი მნიშვნელოვნად გაზრდის უძრავი ქონების ფასებს თბილისში.
,,მოგეხსენებათ, რომ თბილისი ყოველთვის გამოირჩეოდა იმით, რომ იყო სხვადასხვა ეროვნების, კულტურის ხალხთა ერთად ცხოვრების ძალიან მნიშვნელოვანი პრეცედენტი. ეს უნდა შევინარჩუნოთ და განვავითაროთ მომავალში. ძალიან მნიშვნელოვანია ის, რომ პროექტი იმ ვადებში დამთავრდეს, რაზეც დღეს არის საუბარი და ეს არის 2016 წლის ბოლო. ჩვენ გვექნება განახლებული რაიონი, ახალი საფეხმავლო სივრცეებით, კაფე-ბარებით და ძალიან ლამაზი ბაღებით, რაც ამ პროექტის ერთ-ერთი ყველაზე მნიშვნელოვანი განმასხვავებელი თვისებაა”, - განაცხადა პრემიერმა.
მისივე თქმით, ქალაქს შეემატება ახალი ტურისტული მარშრუტები.
პრემიერი მნიშვნელოვნად მიიჩნევს, იმას, რომ ყველა აღდგენილ შენობაზე გამოკრული იქნება კალენდარი, თუ რა ვადაში დამთავრდება თითოეული შენობა.
,,ყველამ ერთად ეს ქვეყანა უნდა ავაგუგუნოთ და დღეს აქ აღმაშენებელის გამზირზე იწყება ეს პროცესი", - დასძინა კვირიკაშვილმა.
