პროექტი „ახალი ტფილისი“ რამდენიმე ეტაპისგან შედგება, - ამის შესახებ დედაქალაქის მერმა დავით ნარმანიამ პროექტის „ახალი ტფილისი!“ პრეზენტაციაზე განაცხადა.
მისი თქმით, უკვე მიმდინარეობს ღვინის აღმართისა და გუდიაშვილის მოედნის მიმდებარე ტერიტორიის რესტავრაცია-რეაბილიტაცია.
„დღეს კი დაიწყო დავით აღმაშენებლის გამზირის, კერძოდ მარჯანიშვილის მოედნიდან ზაარბრუკენის მოედნამდე არსებული ტერიტორიის და მშრალი ხიდის მიმდებარე არეალის სრული რესტავრაცია-რეაბილიტაცია“, - განაცხადა ნარმანიამ და დასძინა, - რაც შეეხება იმ მასშტაბურ სამუშაოებს, რომელიც ამ წუთებში დაიწო დავით აღმაშენებლის გამზირის 45 მისამართზე. პროექტის ფარგლებში შენობა-ნაგებობების სრული რესტავრაცია-რეაბილიტაცია განხორციელდება. ამასთან, მთლიანად განახლდება ყველა ტიპის საკომუნიკაციო და საინჟინრო ქსელები, მოპირკეთდება ქუჩები, დამონტაჟდება ახალი განათებები და მანიშნებლები“.
დედაქალაქის მერმა აღნიშნა, რომ შეიცვლება გამზირის საფეხმავლო და სამანქანო სავალი ნაწილის საფარი. მოეწყობა გადასასვლელები, ჩატარდება გამწვანების ღონისძიებები. სარეკონსტრუქციო სამუშაოების დასრულების შემდეგ აღნიშნული ტერიტორია სრულად ადაპტირებული იქნება შეზღუდული შესაძლებლობების მქონე პირთათვის.
